Ինչի՜ վրա են ավելի քան 72 միլիոն դոլար ծախսել... «մլիցեքի»

Նիկոլ Փաշինյանն Արտաշատում մասնակցել է ոստիկանության պարեկային ծառայության Արարատի մարզի ստորաբաժանման «բացմանը»: 
Դե, նրա ջանքերով Հայաստանը ոստիկանապետություն է, դրա համար էլ ոստիկանական «բացումներ» են:
Պաշտոնական հաղորդագրությունից իմանում ենք, որ միջոցառմանը ներկա են գտնվել նաև Փաշինյանի համերկրացի ու բացառապես այդ պատճառով ՆԳ նախարար Վահե Ղազարյանը, տարածքային կառավարման և ենթակառուցվածքների նախարար Գնել Սանոսյանը, արտերկրի դիվանագիտական ծառայությունների ներկայացուցիչներ և այլ պաշտոնատար անձինք:
Ն.Փաշինյանը... շնորհավորել է (դե, իհարկե, ինչպիսի՜ հրաշալի առիթ) Արարատի մարզի բնակիչներին՝ պարեկային ոստիկանության նորամուտի առիթով և հույս հայտնել, որ ծառայության աշխատանքին զուգընթաց նրանք իրենց ավելի պաշտպանված կզգան։
Չէ, դուք մի հատ «խորացեք». Արարատի մարզում, որի եզրերն արդեն կրծում է թշնամին, մարդիկ պաշտպանված են զգալու... ոստիկանական առատությունից: 
Փաշինյանը շնորհակալություն է հայտնել միջազգային գործընկերներին՝ պարեկային ոստիկանության հիմնադրման հարցում Կառավարությանն աջակցելու համար։ «Պարեկային ոստիկանության հիմնադրման համար, ընդհանուր առմամբ, ծախսվել է 29 մլրդ դրամ։ Այդ 29 մլրդ դրամից 20 մլրդը ծախսվել է Հայաստանի Հանրապետության պետական բյուջեից, 6 մլրդը տրամադրվել է Ամերիկայի Միացյալ Նահանգների կողմից, 3 մլրդը` Եվրամիության։ Ցանկանում եմ մեր գործընկերներին և Հայաստանի Հանրապետության բոլոր հարկ վճարողներին շնորհակալություն հայտնել այս գործընթացն իրականություն դարձնելու համար»,-ասել է Փաշինյանը:
Նա հայտնել է, որ  առաջիկայում պարեկային ոստիկանությունում նոր ընդունելություն է  կազմակերպվելու` 300 նոր ծառայողով համալրվելու համար: Այդ 300 ծառայողների շուրջ 80 տոկոսը լինելու են կանայք։
Այսինքն՝ պետբյուջեի հացը ձրի ուտողների քանակն ավելանալու է: 
Ի՞նչ է ստացվում. իսկ ստացվում է այն, որ հազարումի խնդիր ունեցող, ձեռից գնացող երկրում ավելի քան 72 միլիոն դոլար է ծախսվում... ոստիկանական անիմաստ ստորաբաժանումներ ստեղծելու, դրանց հանդերձավորելու, ֆինանսավորելու վրա: 
Պատկերացնո՞ւմ եք, թե 72 միլիոն դոլարով ինչ պաշտպանական խնդիրներ կարելի էր լուծել: Քանի՞ նոր մարտական ստորաբաժանում կարելի էր պատրաստել: Իսկ սրանք... ոստիկանական պարեկներ: Պարեկապետություն... 
Ի դեպ, զարմանալի է, որ մինչև հիմա այդ ծառայությունը չի վերանվանվել, ասենք՝ Նիկոլի անվան պարեկային ծառայություն: 
Zham.am