Ո՞ր հրապարակումների պատճառով էր «Հրապարակը» հարձակման թիրախում հայտնվել

Շուրջ երկու օր տևած կատաղի, եթե ոչ՝ մոլեգին ծրագրահենային հարձակման թիրախում հայտնվելու պատճառով, ինչպես հայտնի է, միառժամանակ խափանվել էր «Հրապարակ» օրաթերի կայքէջի աշխատանքը: Կայքն անհասանելի էր դարձել հազարավոր ընթերցողներին: Այսօր արդեն կայքի աշխատանքը կարգավորվել է, հասկանալի է՝ ձեռնարկված մի շարք քայլերից հետո: 
այնուհանդերձ, պետք չէ Շերլոկ Հոլմս, Էրքյուլ Պուարո կամ նույնիսկ կապիտան Ժեգլով ու կոմիսար Մեգրե լինել՝ հասկանալու համար, թե հատկապես որտեղի՛ց իջեցված հրահանգով էր իրականացվել այդ հարձակումը խոսքի ու մամուլի ազատության վրա: 
«Հրապարակի» գործընկերները հոդվածաշարով փորձել են կռահել, թե իրենց կոնկրետ ո՛ր հրապարակումների պատճառով կարող էր տեղի ունենալ այդ հարձակումը: 
Ներկայացնում ենք այդ անդրադարձերից մեկը. 
«Երկու օր մեր կայքն աննախադեպ կիբերհարձակման էր ենթարկվել, որի արդյունքում չէր գործում․ 15 տարվա մեր գործունեության ընթացքում նման բան չէր եղել, որ hraparak.am-ը չգործի։ Նման հարձակումներ, մեզ ասացին, որ իրականացվել են ռուսական կայքերի վրա, ռուս-ուկրաինական պատերազմի մեկնարկի պահին եւ միայն պետական կառույցների աջակցությամբ են հաղթահարվել։ 
«Հրապարակը» մեն մենակ էր պայքարում այդ հարձակման դեմ, որին պետական կառույցները ոչ միայն որեւէ կերպ չաջակցեցին, այլ մենք հիմնավոր կասկածներ ունենք, որ արշավը նախաձեռնվել եւ կազմակերպվել է հենց պետության ներկայացուցիչների՝ իշխանությունների կողմից։
Այս օրերին մենք եւ մեր ընթերցողները փորձում էինք գուշակել, թե ինչն է այս հարձակման առիթը հանդիսացել (պատճառը հասկանալի է՝ «Հրապարակի» գործունեությունն է առհասարակ)։ Ո՞ր հրապարակումներն են մղել նման աննախադեպ եւ որ ամենակարեւորն է՝ խիստ ծախսատար արշավը կազմակերպելուն։

Մեր ընթերցողների եւ փորձագետների օգնությամբ փորձել ենք առանձնացնել վերջին օրերի նման հրապարակումները եւ ընթերցողների խնդրանքով՝ որոշել ենք վերահրապարակել։ 
Դրանցից մեկը, ըստ փորձագիտական խմբի, այս հրապարակումն է եղել․

Թեպետ հայաստանյան իշխանություններն Արցախի նախագահ Սամվել Շահրամանյանին են մեղադրում Արցախի վերջնական կապիտուլյացիայի, լուծարման հրամանագիր ստորագրելու համար, փորձում հանրությանը հավատացնել, թե Փաշինյանը կապ չունի այդ որոշման հետ, անգամ տեղյակ էլ չի եղել, սակայն  իշխանական աղբյուրներն այլ մանրամասներ են պատմում, որ Նիկոլ Փաշինյանն անձամբ տեղյակ է եղել այդ հրամանագրի տեքստին եւ անձամբ է Շահրամանյանին հորդորել՝ ամեն ինչ անել, որ ռազմական էսկալացիան դադարեցվի` համաձայնելով Ադրբեջանի բոլոր պահանջներին։ Մասնավորապես, երբ ադրբեջանցիներն արցախցիներին են փոխանցել իրենց պահանջները, որոնք արտացոլված էին Արցախի լուծարման որոշման մեջ, այն է՝ պետական ինստիտուտների, բանակի լուծարում, զենքերի հանձնում, Շահրամանյանը կապ է հաստատել ԱԱԾ տնօրեն Արմեն Աբազյանի հետ եւ վերջինիս միջնորդությամբ մեկ եւ եզակի անգամ հեռախոսազրույց է ունեցել Փաշինյանի հետ, ով էլ հորդորել է՝ անհապաղ կատարել Ադրբեջանի բոլոր պահանջները, թույլ չտալ, որ պատերազմը տեղափոխվի Հայաստանի տարածք։
Բնօրինակ հրապարակումը այս հասցեով՝ : https://hraparak.am/post/dc49dcd5dbae94bf57b70f64b13bfa5a