«Հրապարակի» վրա հաքերային հարձակումը շարունակվել է նոր թափով

«Հրապարակ» թերթի կայքէջի վրա նախօրեին իրականացված ծրագրահենային (հաքերային) հարձակումը շարունակվել է նոր թափով, ինչի հետևանքով այս ակտիվ լրատվամիջոցի կաքն անհաանելի է իր հազարավոր ընթերցողներին: Սա քրեստոմատիկ օրինակ է, թե «ժողովրդավարության բաստիոնում», օրուգիշեր ժողովրդավարությունից ճամարտակող իշխանությունների, ժողովրդավարական դիմակներով հանդես եկող նրան հոտնկայս ծափահարողների պայմաններում ինչպես են գեբելսաբար լռեցնում անհաճո լրատվամիջոցները, ինչպես են ճնշում խոսքի ու տեղեկատվություն ստանալու ազատությունները: 
«Հրապարակի» գլխավոր խմբագիր Արմինե Օհանյանը ֆեյսբուքյան գրառմամբ նկատել է. «Արդեն 24 ժամ է «Հրապարակի» կայքը չի աշխատում։ Երեկ ողջ օրը փորձել ենք խնդիրը կարգավորել։ Անգամ սերվեր ենք փոխել։ Գիշերը մեկ ժամով կարգավորվել է, իսկ առավոտյան նոր թափով է շարունակվել հարձակումը՝ շատ ավելի մեծաթիվ, քան երեկ էր։ Մենք հարձակման երկիրը գիտենք՝ ԱՄՆ։ Բայց ես առաջարկում եմ այս ակտը կազմակերպող հերոսներն ինքնաբացահայտվեն։ Ինչպես են տեռորիստական ակտերից հետո տեռորն իրականացրած կազմակերպություններն իրենց վրա վերցնում տեռորի պատասխանատվությունը եւ պահանջներ առաջ քաշում՝ ուղղված զոհին։ Դա ճիշտ կլինի նաև այն առումով, որ եթե չեք բացահայտվում եւ մենք չենք հասկանում, թե ինչ եք մեզնից ուզում, ապա անգամ մեծ ցանկության դեպքում այդ պահանջները չենք կարող գուշակել-կատարել․․․ Մեծ հաշվով, իհարկե, հասկանալի է, թե որտեղից են «աճում» սրա ոտքերը, բայց ավելի կոնկրետացրեք, որ իմանանք ժողովրդավարության մասին զօրուգիշեր խոսողները մեզնից ինչ են ուզում․․․․»:
Zham.am