Արցախի ԱԺ պատգամավորը դատի կտա Թաթուլ Հակոբյանին՝ զրպարտության համար

Արցախի «Արդարություն» խմբակցության ղեկավար Դավիթ Գալստյանը զրպարտության համար դատական հայց է ներկայացնելու լրագրող Թաթուլ Հակոբյանի դեմ։ Այս մասին, 24.news-ի վրա հղումով հաղորդում է Panorama.am-ը:
«Այդ անձը հայտարարել էր, որ արդեն Ստեփանակերտի պարետ է նշանակվել, ինչին մենք արձագանքել էինք՝ դրանք թուրք-ադրբեջանական ջրաղացին ջուր լցնող գործիչներ են։ Թաթուլ Հակոբյան դեմ առաջիկա օրերին զրպարտության համար հայց կներկայացվի դատարան», -24.news-ի հետ զրույցում ասել է Դավիթ Գալստյանը։
Պետք է հիշեցնել, որ հոկտեմբերի 3-ին լրագրող Թաթուլ Հակոբյանը գրառում էր կատարել, որ Շուշիի «Ավան պլազա» հյուրանոցի նախկին տնօրեն Սարգիս Գալստյանը նշանակվել է Արցախում Ադրբեջանի ներկայացուցիչ՝ պարետ։ Այդ գրառումից հետո Սարգիս Գալսյանի դեմ «ատելության խոսքի» հեղեղ տեղաց, նա հայտնվեց ամենատարբեր հայհոյախոսությունների ու նաև սպառնելիքների թիրախում: 
Իսկ այսօր հայտնի դարձավ, որ Ադրբեջանի նախագահ Իլհամ Ալիևը Ստեփանակերտի պարետ է նշանակել Սարդար Սաֆարովին։