Փաշինյանի կառավարությունը ոստիկանական պարեկների համար միշտ փող ունի

Հոկտեմբերի վերջին ոստիկանության պարեկային ծառայությունը կգործի Հայաստանի ամբողջ տարածքում։ Այս մասին, ինչպես հաղորդում է News.am-ը, այսօր՝ հոկտեմբերի 12-ին, ՀՀ կառավարության նիստում հայտարարել է ՆԳ նախարար Վահե Ղազարյանը։
Այդ նպատակով ՀՀ–ն անհատույց գույք է ստացել Եվրամիությունից։
«Եվրամիությունից ակնկալում ենք ընդհանուր առմամբ 75 «Շկոդա» մակնիշի ամենագնաց, որից 51–ն արդեն ՀՀ–ում են, մնացած 24–ը երկրորդ փուլով կհանձնվեն ՀՀ–ին»,– նշել է Ղազարյանը։
Նիկոլ Փաշինյանն ավելացրել է, որ 2023 թ. դեկտեմբերին Սևանա լճում կգործարկվի նաև ջրային պարեկային ծառայությունը։
«Հիմա մենք ունենք երկու մոտորանավակ, որը նվիրել է ՌԴ կառավարությունը, ևս երկուսը նրանից ձեռք կբերենք մրցույթով։ Եվս մեկ մոտորանավակ որպես նվեր կստանանք ԵՄ անդամ երկրներից մեկից, թե որ մեկից, մոտ օրերս կիմանաք, երբ կգա, տեղ կհասնի»,– հայտարարեց վարչապետը։
Փաշինյանը ընդգծել է, որ պարեկային ծառայության համար նաև ՀՀ կառավարությունն է մրցութային կարգով տրամադրել «Շկոդա» մակնիշի 65 մեքենա։
«Ես ասել եմ ու նորից կրկնում եմ` պարեկային ոստիկանությունը ոչ մի օգտագործած ու հին գույք չպետք է ունենա` սկսած զենքից»,– ասել է նա։
Նրա համոզմամբ` ոստիկանությունը, այդ թվում` հենց պարեկային ծառայությունը, այսօր մեր հանրության շրջանում ունի մեծ վստահություն։
Լուսանկարը՝ aravot.am-ի կայքից