Քաղբանտարկյալ Արմեն Աշոտյանի խափանման միջոց կալանքը երկարացվեց ևս երեք ամսով (տեսանյութ)

Ինչպես հաղորդում է tert.am-ը, ՀՀԿ փոխնախագահ Արմեն Աշոտյանի խափանման միջոց կալանքը երկարացվեց ևս երեք ամսով։ Նման որոշում կայացվեց ՀՀ հակակոռուպցիոն դատարանում, որտեղ Աշոտյանի փաստաբանները միջնորդություն էին ներկայացրել` վերանայելու և փոխելու կալանքը` որպես խափանման միջոց կիրառելը։ 
Րոպեներ առաջ վճիռը ներկայացնելիս դատավոր Վահե Դոլմազյանն ասաց․ «Սույն գործով մեղադրյալ Արմեն Գևորգի Աշոտյանի  նկատմամբ կիրառված խափանման միջոց կալանքի ժամկետը երկարացնել 3 ամիս ժամկետով՝ մինչև 2024 թվականի հունվարի 15-ը»։
Հիշեցնենք, որ Արմեն Աշոտյանը երկու ամսով կալանավորվել էր հունիսի 16-ին։ Սեպտեմբերի 28-ին Վերաքննիչ հակակոռուպցիոն դատարանի դատավոր Սերգեյ Մարաբյանը մերժեց վերաքննիչ բողոքները և նրան թողեց կալանքի տակ։
Իսկ News.am-ը հրապարակել է հատված դատական նիստի ընթացքից, մասնավորապես, Արմեն Աշոտյանի ելույթը, որին նախագահող դատավորը ամեն կերպ փորձում էր խոչընդոտել: Դատավորն ակնհայտորեն նյարդայնանում և ուղղակի անվերահսկելի խուճապի մեջ էր հայտնվում այն բանից, որ Արմեն Աշոտյանը կարող է խոսել ու խոսում է: Երևի նույնիսկ ստալինյան տրոյկաները նման պահվածք չեն դրսևորել: 
Իսկ Արմեն Աշոտյանը մասնավորապես հայտարարեց. «Ինձ վատ եմ զգում, որ ես նստած եմ Հայաստանի բանտում, իսկ իմ տասնյակ հայրենակիցներ՝ Բաքվում»: