Ալիևը հայտարարել է, թե Փաշինյանը խաղաղություն չի ցանկանում

Ինչպես հաղորդում է News.am-ը, Ալիևը հայտարարաել է, թե իր կարծիքով, Փաշինյանը խաղաղություն չի ցանկանում, այլապես «կարևոր գործերը» կթողներ ու մի քանի ժամով Բիշքեկ կմեկներ: News.am-ը գրում է. «Եթե Մոսկվայի միջնորդությունը Բաքվի եւ Երեւանի հարաբերությունների կարգավորման հարցում մերժվի հայկական կողմից, ապա այլընտրանքը կարող են լինել ուղիղ բանակցությունները Ադրբեջանի եւ Հայաստանի արտգործնախարարների միջեւ։ Այս մասին ասել է Ադրբեջանի նախագահ Իլհամ Ալիեւը։
«Հոկտեմբերի 12-ին ռուսական կողմի առաջարկով պետք է տեղի ունենար Ռուսաստանի, Ադրբեջանի եւ Հայաստանի արտաքին գործերի նախարարների հանդիպումը Բիշքեկում։ Ռուսաստանի Դաշնության միջնորդությունը մենք ընկալում ենք երախտագիտությամբ, քանի որ Ռուսաստանը՝ մեր հարեւանն ու դաշնակիցը, ինչպես նաեւ Հայաստանի դաշնակիցը, գտնվում է մեր տարածաշրջանում, ի տարբերություն նրանց, որոնք հազարավոր կիլոմետրեր հեռու են։ Մենք այս առաջարկը դրական ենք ընկալել, եւ մեր արտաքին գործերի նախարարը  պատրաստ է հանդիպել ռուս եւ հայ գործընկերների հետ։ Ցավոք, հայկական կողմը այդ հանդիպումից հրաժարվել է։ Եվ ահա հիմա հարց է ծագում. ցանկանո՞ւմ է արդյոք Հայաստանը խաղաղություն։ Ես կարծում եմ, որ ոչ, որովհետեւ եթե խաղաղություն ցանկանար, չէր հրաժարվի այդ հնարավորությունից։ Հայաստանի վարչապետը 6 ժամ թռչում է Գրանադա, մասնակցում այնտեղ անհասկանալի հանդիպման, որտեղ քննարկվում է Ադրբեջանն առանց Ադրբեջանի, իսկ 2-3 ժամով Բիշքեկ թռչել չի կարող, կարեւոր գործեր ունի»,- նշել է նա։
Ալիեւը հավաստիացրել է, որ Բաքուն պատրաստ է «շարունակել աշխատել խաղաղության պայմանագրի ուղղությամբ»։ «Եթե հայկական կողմը մերժի Ռուսաստանի Դաշնության միջնորդությունը, կարծում եմ, որ այլընտրանք կարող են լինել ուղիղ բանակցությունները Ադրբեջանի եւ Հայաստանի արտաքին գործերի նախարարների միջեւ։ Որեւէ այլ հարթակ մենք կդիտարկենք՝ հաշվի առնելով այն երկրների վերաբերմունքը, որոնք առաջարկում են իրենց ծառայությունները ոչ թե Ադրբեջանի, այլ միջազգային իրավունքի ճշմարտացիությանը»,- նշել է նա։
Մեր կողմից հավելենք, որ դժվար չէ նկատել, թե ինչպես է Ալիևը նախ, ծաղրում Փաշինյանին, ապա բավականին «արևելյան» դրսևորմամբ շողոքորթում Ռուսաստանին, ի լրումն, օգտվելով առանց այդ էլ Փաշինյանի իշխանության կողմից հայ-ռուսական հարաբերությունները ծայրահեղորեն փչացրած լինելու հանգամանքից, էլ ավելի է Ռուսաստանին տրամադրում Հայաստանի դեմ: