Փաշինյանը գործնականում հաստատեց. այո, Ադրբեջանին «անկլավներ» տալու հարց կա

Հանրային հեռուստաընկերությանը տված հարցազրույցում Նիկոլ Փաշինյանը կրկնեց Գրանադայում ստորագրած հայտարարության գրեթե բոլոր կետերը, բնականաբար, դրանք բնորոշելով որպես առավելություններ, այդ թվում՝ Ադրբեջանի տարածքային ամբողջականությունն իր կողմից ճանաչելը: 
«Բացը այն է, որ հայտարարությունը քառակողմ է, և ոչ թե հնգակողմ: Այսինքն, եթե ի սկզբանե նախատեսվում էր, որ պետք է լինի հնգակողմ, բայց Ադրբեջանի ստորագրության բացակայությունը այդ փաստաթղթի ներքո թերություններից է: Օրինակ եթե հիմա այդ թղթի ներքո լիներ Ադրբեջանի ստորագրությունը, ես հիմա կասեի, որ հավանականությունը, որ մենք մինչեւ տարվա վերջ կստորագրենք խաղաղության պայմանագիր, 70 տոկոսից ավելի բարձր է»,-հայտարարեց Փաշինյանը: 
Անդրադառնալով Ալիևի՝ Գրանադա չմեկնելու հնարավոր վարկածներին, Փաշինյանը մասնավորապես նշեց. «Երկրորդ մեկնաբանությունը, որի անաչառությունը առաջիկայում ստուգելու հնարավորություն կլինի, այն է, որ այնուամենայնիվ, Ադրբեջանը փորձում է այնպես անել, որ խաղաղությունը տեղի չունենա»:
Փաշինյանն ըստ էության չհերքեց, իսկ գործնականում հաստատեց, որ Ադրբեջանի կողմից կա բարձրացրած «8 անկլավների» խնդիր՝ Ադրբեջանի տարածքային ամբողջականության ընկալման մեջ, բայց սկսեց խոսել այն մասին, թե ինքն էլ որոշակի տարածքներ վերադարձնելու հարց է դնում, մասնավորապես՝ Բերքաբերում, Այգեհովիտում, Վազաշենում, Պառավաքարում, «այլ տարածքներում նույնպես»: Բայց Փաշինյանն այդտեղ չհիշատակեց միայն վերջին 2 տարվա ընթացքում Ադրբեջանի կողմից Հայաստանի շուրջ 100 քառակումի կմ տարածք գրավելու և այդ տարածքները վերադարձնելու մասին: Փոխարենը սկսեց պատմել Արծվաշենի մասին՝ ակնարկելով, որ եթե ինքը «անկլավներ» է տալիս Ադրբեջանին, ապա նաև «անկլավ» վերադարձնելու պահանջ է դնում: Թե որքանով կարող է լեզու շարժելով ու թղթեր թափահարելով «անկլավ» վերադարձնել մի գործիչ, որը թշնամուն է հանձնել Արցախը, ազատագրված տարածքները, ապա շարունակել է հանձնել Հայաստանի Հանրապետության տարածքները, այդ թվում՝ ռազմավարական նշանակության բարձունքներ, ճանապարհի ամբողջական հատված, երևի ավելորդ է ասել: Հիշեցնենք նաև, որ նա ավելի վաղ ասուլիսում նշել էր, որ տարածքային ամբողջականությունը ներառում է անկլավները, իսկ իր աշխատակազմի ղեկավարը, Գրանադայի հանդիպումից հետո հրապարակային հայտարարել էր, թե իբր, նման հարց չի եղել: Այսինքն՝ վերջինս միտումնավոր մոլորեցնում էր հանրությանը:  
Ավելին, Փաշինյանը խոսքի մեջ նշեց. «Խնդիրը այն է, որ մինչեւ հիմա Ադրբեջանի նախագահը Հայաստանի՝ 29 800 քկմ տարածքային ամբողջականությունը ճնաչելու մասին հրապարակային հայտարարություն չի արել»: 
Պետրոս Ղազարյանը նրան այդպես էլ չհարցրեց՝ բա այդ դեպքում դու ինչո՞ւ ես օրումեջ, իսկ վերջերս էլ՝ օրը երկու անգամ հայտարարում, թե Ադրբեջանի տարածքային ամբողջականությունն ամբողջապես ճանաչում ես: 
Փաշինյանը հայտարարեց նաև, թե ինքը ոչ Ադրբեջանին,, ոչ էլ Էրդողանին ոչ մի «միջանցք» էլ խոսք չի տվել: Այսինքն, Փաշինյանը ակնարկեց, որ Էրդողանն ու Ալիևը «լկտի սուտ» են ասում: 
Ի դեպ, երբ եկավ «ռուսական բլոկի» հարցերի հերթը, Փաշինյանն ամեն կերպ ուզում էր համոզել, թե Ռուսաստանի հետ իր հարաբերություններն ուղղակի հրաշալի են ու անամպ: 
Zham.am