Մարությանը կվերցնի ավագանու մանդատը, «Մայր Հայաստանը» դեռ նման հարցեր չի էլ քննարկել

«Ազգային առաջընթաց» կուսակցության առաջին համարը՝ Հայկ Մարությանը արդեն վերցրել է մանդատը և Երևանի ավագանու առաջիկա նիստերին մասնակցելու է։ Այս մասին News.am-ին  հայտնել է Մարությանի ներկայացուցիչը: Նա նաև նշել է, որ իրենք պատրաստվում են աշխատել որպես ընդդիմադիր խմբակցություն: «Հայկ Մարությանը արդեն վերցրել է իր մանդատը, իսկ թե ինչ օրակարգով կշարունակենք աշխատանքը, ապա դա հայտնի կդառնա առաջիկա նիստերին»,- նշել է Հակոբ Կարապետյանը:
Ինչ վերաբերում է Տիգրան Ավինյանի՝ քաղաքապետ դառնալուն, Կարապետյանը նշել է, որ տեղի չի ունեցել մի բան, որն անակնկալ կլիներ Հայկ Մարությանի համար։
«Այսինքն՝ ի սկզբանե կար հնարավորություն, որ ընդդիմությունը ընտրի քաղաքապետի միասնական թեկնածուի՝ Հայկ Մարությանին, բայց հետո պարզ դարձավ, որ այդ ընդդիմադիր կուսակցություններից մեկը՝ «Հանրային ձայն» կուսակցությունը ուղղակիորեն չունի բավարար ձայներ, որպեսզի տրամադրի միասնական ընդդիմության թեկնածուի քաղաքապետ դառնալու գործին։ Այսինքն՝ իրենք ինչ-որ պաշտոններ էին ակնկալում կամ առեւտուր էին անում այդ հարցի շուրջ՝ չունենալով այն, ինչը իրենք պատրաստվում էին առաջարկել։ Այդ պատճառով Հայկ Մարությանն առաջարկեց անցկացնել նոր ընտրությունների, որպեսզի բացառենք ՔՊ թեկնածուի՝ քաղաքապետ դառնալը։ «Հանրապետություն» կուսակցությունը, որը ընդդիմադիր կեցվածքով ձայներ էր հավաքել ընտրությունների ժամանակ, իրենք անվերապահորեն իրենց ձայները տվեցին ՔՊ-ին, և «Հանրային ձայն» կուսակցության ղեկավարը, որը քննադատում էր ՔՊ-ին, եկավ ժամանակ, երբ խոսքերը գործի պետք է վերածվեին, սակայն կուսակցությունը իր ձայները այսպես ասած՝ տվեց ՔՊ-ին»,-ասել է Հայկ Մարությանի ներկայացուցիչը: 

«Մայր Հայաստան» դաշինքի առաջնորդ Անդրանիկ Թևանյանը News.am-ի հետ զրույցում նույնպես նշել է, որ իր համար այս իրավիճակը կանխատեսելի էր։
Հարցին՝ արդյո՞ք դաշինքի անդամները մասնակցելու են ավագանու նիստերին, Անդրանիկ Թևանյանը պատասխանել է. «Նման հարցերի հետ կապված մենք դեռ քննարկում չենք անցկացրել, երբ անցկացնենք, հրապարակային հայտարարությամբ հանդես կգանք»։