Միրզոյանը Բիշքեկ չի գնա, Լավրով-Բայրամով-Միրզոյան հանդիպում էլ չի կայանա

Հայաստանի ԱԳ նախարար Արարատ Միրզոյանը Բիշքեկ չի մեկնելու: ԱԳՆ մամուլի խոսնակ Անի Բադալյանը լրատվամիջոցներին հայտնել է, որ Հայաստանի ԱԳ նախարարությունը դեռ հոկտեմբերի 4-ին է գրավոր տեղեկացրել ԱՊՀ գործադիր կոմիտեին, որ հոկտեմբերի 12-ին Բիշքեկում նախատեսվող ԱՊՀ ԱԳ նախարարների խորհրդի նիստին կմասնակցի ԱԳ նախարարի տեղակալը: 
Մինչդեռ Ռուսաստանի ԱԳ փոխնախարար Գալուզինը ՌԲԿ-ին տված հարցազրույցում նշում էր, թե հոկտեմբերի 12-ին Բիշքեկում կարող է Լավրով-Բայրամով-Միրզոյան հանդիպում լինել:
Կա՛՛մ ՌԴ ԱԳՆ-ում ԱՊՀ գործկոմի գրագրությունից տեղյակ չեն, կա՛՛մ էլ նման հայտարարությամբ ցանկանում էին մի վերջին անգամ անուղղակիորեն հորդորել Միրզոյանին, որ այնուամենայնիվ «փեշի քարը թափի» և մեկնի Բիշքեկ: Բայց, ինչպես տեսնում ենք, «պաշտոնական Երևանը» բավականին ամուր դիրք է բռնել. Արարատ Միրզոյանը չէ որ՝ չէ, չի գնում: Տեղակալին է գործուղում: 
Մյուս կողմից, միգուցե պետք է այդ չգնալու մեջ «դրական պահ» տեսնել, քանի որ Փաշինյանն ու նրա ներկայացուցիչները վերջերս ուր գնում են, մի վնասակար բան ստորագրում են, Ադրբեջանին զիջումներ են անում, ապա հայտարարում, թե՝ «հաղթել ենք, չվախենաք»:

Zham.am