Իսրայելահայերի միության նախագահն ասել է, որ հայերի շրջանում տուժшծներ չկան. «Թերթ.ամ»
Այսօր «Համաս» շարժումը Գազայի հատվածից հրթիռային հարվածներ է հասցրել Իսրայելին, ապա նաև ցամաքային ուժերով անցել հարձակման: Ընթանում են մարտական գործողություններ: Իսրայելի վարչապետը հայտարարել է, որ իրենք գտնվում են պատերազմի վիճակում:
«Թերթ.ամ»-ի գործընկերներին հաջողվել է կապ հաստատել «Իսրայելահայեր» թերթի գլխավոր խմբագիր, Պետախ Տիկվա քաղաքի իսրայելահայերի «Նաիրի» միության նախագահ Արտյոմ Չերնամորյանի հետ:
Նա պատմել է, որ հռթիռակոծության մասին տեղեկությունը ստանալուն պես անմիջապես ռմբապաստարաններում են տեղավորվել:
Իսրայելահայերի «Նաիրի» միության նախագահը կապ մեջ է հայերի հետ, գրեթե բոլորից տեղեկություններ ունի։ Արտյոմ Չերնամորյանի խոսքով՝ հայերի շրջանում տուժածներ չկան։
«Իսրայելի կենտրոնական քաղաքներում 3 հազարից ավել հայ կա։ Հարավային շրջանում մենք հայ բնակչություն չունենք, մի քանի ընտանիք կա միայն Սդերոտ քաղաքում։ Իրենցից տեղեկություն չունեմ, որովհետև կապ չկա։ Կենտրոնական քաղաքաների հայ բնակչության հետ, սակայն, ինտերնետով գրեթե բոլորի հետ կապի մեջ եմ։ Հիմա մեր վիճակն էլ է նույնը, ինչ Իսրայելի բնակչության։ Հայերը հիմա պատսպարված են ապաստարաններում։ Բոլորից տեղեկություն ունեմ, այս պահի դրությամբ հայերի շրջանում տուժածներ չկան։ Ցավոք սրտի, Իսրայելում խաղաղ բնակչության շրջանում արդեն կան տասնյակ զոհեր և վիրավորներ։ Ներթափանցել են մարդկանց տները, նրանց են մորթել։ Վիճակը ծանր է»,- «Թերթ.ամ»-ին պատմել է նա:
Նշենք, որ առկա տեղեկությունների համաձայն, առավոտյան սկսած հրթիռային հարվածների ու մարտական գործողությունների հետևանքով կան տասնյակ զոհեր, հարյուրավոր վիրավորներ:
Հետևեք մեզ Facebook-ում