Գազայի հատվածից «Համաս» շարժումը հրթիռային հարված է հասցրել Իսրայելին, Թել Ավիվում «օդային տագնապի» շչակներն են միացել (լրացված)

Հոկտեմբերի 7-ի առավոտյան, Գազայի հատվածից «Համաս» շարժումը զանգվածային հրթիռային հարված է հասցրել Իսրայելի ուղղությամբ: Հրթիռներ են պայթել Իսրայելի մայրաքաղաք Թել Ավիվում: Ինչպես հաղորդում են միջազգային լրատվական գործակալությունները, այնտեղ գործարկվել են «օդային տագնապի» ազդանշանները: Միաժամանակ, «աշխատում է» իսրայելական ՀՕՊ-ը: «Համաս» շարժումը հաղորդում է Իսրայելի ուղղությամբ շուրջ 5000 հրթիռ արձակելու մասին: 
Իսկ «Ալ-Ջազիրա»-ն հաղորդում է, որ բացի հրթիռներ արձակելուց, Գազայի հատվածից «Համմասի» զինյալները թափանցել են Իսրայելի տարածք և վերահսկողության տակ վերցրել որոշ անցակետեր, խոցվել է իսրայելական տանկ: Մասնավորապես հաղորդվում է, որ իսրայելական բանակը կորցրել է իր հենակետերից մեկը՝ «Էրեզ», որը սահմանակից է Գազայի հատվածին: Սահմանակից որոշ հատվածներում ընթանում են փողոցային մարտեր: Հաղորդվում է նաև, որ «Համաս»-ականները պարապլաններով ու պիկապներով թափանցել են Գազային սահմանակից իսրայելական բնակավայրեր: «Տելեգրամ» ալիքներում տարածվում են տեսանյութեր, որոնցում պատկերված է, թե սահմանակից ավաններից իսրայելցի հարյուրավոր բնակիչներ ինչպես ան ամեն ինչ թողած, վազելով փախչում բնակավայրերից: «Համաս»-ականները տարածում են իսրայելցի գերեվարված և սպանված զինվորների պատկերող կադրեր: 
Նախնական տվյալներով՝ ինչպես իսրայելական բանակի, այնպես էլ՝ Իսրայելի խաղաղ բնակչության շրջանում կան տասնյակ զոհեր և վիրավորներ:  
Իսրայելի բանակը հայտարարել է «լիարժեք մարտական պատրաստության» վիճակի անցնելու մասին, միաժամանակ, քաղաքացիական բնակչությանը հորդորել են երկրի հարավային ու կենտրոնական շրջաններում գտնվել ապաստարաններին մոտիկ, իսկ Գազայի հատվածին սահմանակից մասում՝  մտնել ապաստարաններ:
Zham.am