...Եվ սա Փաշինյանի կառավարությունը ներկայացնում է որպես հաղթանակ. Լևոն Զուրաբյանի արձագանքը

ՀԱԿ համակարգող Լևոն Զուրաբյանը, ոչ առանց դառը սարկազմի, արձագանքել է Փաշինյանի աշխատակազմի ղեկավար Արայիկ Հարությունյանի (նախկին ԿԳՄՍՆ) երեկվա գրառմանը, թե՝ «Ֆեյքազերծում. Հայաստանը Գրանադայում ինչ ցանկացել է, ստացել է՝ հասնելով լուրջ հաղթանակի»: 
Լևոն Զուրաբյանը ֆեյսբուքյան գրառմամբ, հակադարձ ֆեյքազերծում, կամ ինչպես «բլոտի» սիրահարները կասեին՝  «թարս կապույտ» է արել վերոհիշատակյալ Արայիկ Հարությունյանին: ՀԱԿ համակարգողը մասնավորապես գրել է. «Իրականում՝

Հայաստանը նորից միակողմանիորեն ճանաչեց Ադրբեջանի տարածքային ամբողջականությունը, Արցախը եւ անկլավները Ադրբեջանի կազմում (ԽՍՀՄ զինված ուժերի գլխավոր շտաբի ամենավերջին քարտեզների հիման վրա)

Ալիեւը, սպառելով իր ստանալիքը արեւմտյան ֆորմատի շրջանակերում, չներկայացավ Գրանադա եւ, չստորագրելով Հայաստանի կողմից միակողմանի ընդունված խաղաղության փաստաթուղթը, որեւէ պարտավորություն չստանձնեց Հայաստանի եւ արցախահայության նկատմամբ

Փաստորեն, Ալիեւը, օգտագործելով արեւմտյան ֆորմատը, հասավ Հայաստանի կողմից Արցախի ճանաչմանը Ադրբեջանի կազմում եւ, ի վերջո, Արցախի բռնի հայաթափմանը։

Հայաստանը ստացավ Եվրոպական Միության, Ֆրանսիայի եւ Գերմանիայի հավաստիացումներրը Հայաստանի տարածքային ամբողջականությանը, ինքնիշխանությանն եւ սահմանների անխախտելիությանն աջակցելու եւ նյութական օգնության տրամադրելու մասին»։

«Եվ սա Փաշինյանի կառավարությունը ներկայացնում է որպես հաղթանակ»,-վերջում հեգնել է Լևոն Զուրաբյանը:
https://www.facebook.com/levon.zourabian/posts/6640381632706706?ref=embed_post

Zham.am.