Արցախի նախկին նախագահներն ու ԱԺ նախագահը կալանավորվել են 4 ամսով, Արայիկ Հարությունյանին «ցմահ»-ի հոդվածներով են մեղադրում
Թե այդ ինչպես «ստացվեց», որ Արցախի գրեթե բոլոր նախկին ղեկավարները կալանավորվեցին և հայտնվեցին Բաքվի բանտում, երևի պետք է պարզաբանի ռուսական խաղաղապահ ուժերի ղեկավարությունը: Մամուլում արդեն շրջանառվում են հրապարակումներ, որ Արցախի նախկին ղեկավարներին պարզապես խաբել են, ապա նույնքան պարզապես հանձնել ադրբեջանական կողմին:
Այսօր արդեն ադրբեջանական լրատվամիջոցները հաղորդում են, որ դատարանի որոշմամբ, 4 ամսով կալանավորել են Արցախի Հանրապետության նախկին նախագահներ Բակո Սահակյանը, Արկադի Ղուկասյանը, ինչպես նաև՝ ԼՂՀ ԱԺնախագահ Դավիթ Իշխանյանը:
Առայժմ ոչինչ հայտնի չէ նախկին պետնախարար Ռուբեն Վարդանյանի, ՊԲ նախկին հրամանատար Լևոն Մնացականյանի, ՊԲ հրամանատարի նախկին տեղակալ Դավիթ Մանուկյանի և ԱԳ նախկին նախարար Դավիթ Բաբայանի վերաբերյալ: Մասնավորապես, թե նրանք ինչ մեղադրանքներ են ներկայացվել։ Չնայած, բոլորին էլ պարզ է, որ ադրբեջանական հանցագործ իշխանությունները Արցախի նախկին ու վերջին շրջանի բարձրաստիճան ղեկավարներին, մեծ հաշվով, տանջամահ են անելու, մինչ այդ թերևս ինչ-որ «դատավարական» շոու ցուցադրելով:
Ինչ վերաբերում է Արցախի նախկին վարչապետ, նախկին նախագահ Արայիկ Հարությունյանին, ապա արդեն հայտնի է, որ ներկայացված մեղադրանքներով նրան սպառնում է ցմահ բանտարկություն:
Հավելենք, որ ընդդիմության ներկայացուցիչներն էլ նշում են, թե՝ ադրբեջանական կողմն ընտրողաբար գերեվարել ու կալանավորել է հիմնականում այն արցախյան գործիչներին, որոնք հանդես են եկել Նիկոլ Փաշինյանի քննադատությամբ, ինչը չի կարող պատահականություն լինել: Մասնավորապես Հայաստան» խմբակցության պատգամավոր Արթուր Խաչատրյանն այսօր ճեպազրույցի ընթացքում նշեց. «Գիտե՞ք, Ադրբեջանի կողմից ձերբակալվել են Փաշինյանի քաղաքական հակառակորդները»։ Այսինքն, ադրբեջանական բանտում հայտնված գործիչները հիմնականում այն մարդիկ են, երբևէ Փաշինյանին քննադատել են, և ինչպես նկատեց պատգամավորը, ինքը պատահականություններին չի հավատում:
Հետևեք մեզ Facebook-ում