«Ո՞վ ես վաբշե...»,-Փաշինյանը հոխորտաց ընդդիմադիրների հասցեին (տեսանյութ)

Նիկոլ Փաշինյանի ՔՊ-ի ներկայացուցիչ ԱԺ նախագահ Ալեն Սիմոնյանը կառավարություն-ԱԺ այսօրվա հարցուպատասխանի ժամանակ ընդդիմադիրներին հորդորում էր հարգալից դիմել իր ղեկավարին: 
Իսկ Նիկոլ Փաշինյանը «իր ոճի մեջ» էր, խոսում էր փողոցային բառապաշարով, ձեռ էր առնում ընդդիմության ներկայացուցիչներին, նրանց մեղադրեց «Եռաբլուրը» սեփականաշնորհելու և այլ մեղքերի մեջ: 
Արձանագրվեց այսպիսի իրավիճակ: Փաշինյանը հայտարարեց, թե ընդդիմությունը ո՛չ քաղաքացու, ո՛չ Լեռնային Ղարաբաղի, ո՛չ ԼՂ-ի իշխանության, ո՛չ էլ ԼՂ-ի դրոշի նկատմամբ հարգանք չունի։
Փաշինյանն ընդդիմությանը ուղիղ կերպով մեղադրեց Արցախը ծախելու մեջ և ասաց. «Դա ձեզ համար հերթական կոմերցիոն գործարք է, որտեղ կարող եք ծախել, ինչքան  «խուրդա» կմնա, դա է  ձեր էությունը»։
«Հայաստան» խմբակցության պատգամավոր Աննա Գրիգորյանը արձագանքեց, որ Արցախը Փաշինյանն է ծախել։
Փաշինյանը, իր հերթին, կորցնելով հավասարակշռությունը, ձայնը բարձրացնելով, ասաց. Վայ, դուք ծախեցի՞ք, թե՞ մենք։ «Եռաբլուր» լացողնե՛ր, «Եռաբլուրի» կեսը սեփականաշնորհել էիք։ Էդ դուք չեք Եռաբլուրի վրա «Լեքսուս» ու «Տոյոտա» սարքողներ։ Եկել եք էդ ի՞նչ եք խոսում։ Փորը տնգած եկել է, խոսում է... ով ես վաբշե»։
Պատգամավորը նրան ամոթանք տվեց, Փաշինյանն էլ իր հերթին սկսեց գոռգոռալ՝ «Ամո՛թը քեզ»:
Ալեն Սիմոնյանն էլ հորդորեց պատգամավորներին, որ հարգալից լինեն: 
Տեսանյութը՝ tert.am կայքից