Հայաստանն ունի Արտաքին հետախուզության ծառայություն, «թիվ 1 հետախույզն» էլ Քրիստինե Գրիգորյանն է

Նիկոլ Փաշինյանն այսօր Հայաստանի «թիվ 1 հետախույզ» է նշանակել ՄԻ նախկին պաշտպան Քրիստինե Գրիգորյանին: Նա գլխավորելու է Հայաստանի արտաքին հետախուզության նորաստեղծ ծառայությունը: 
Նիկոլ Փաշինյանի խոսնակ Նազելի Բաղդասարյանը (Արցախ բառն արտասանելու համար ներողություն խնդրողն է) «Արմենպրեսին» տված հարցազրույցում անդրադարձել է ԱՀԾ ձևավորման և այդ պաշտոնում Քրիստինե Գրիգորյանի նշանակման հետ կապված որոշ մանրամասնությունների: 
Հարցին՝ թե ծառայությունը տեղակայման վայր ունի՞, աշխատանքի ընդունվելու համար մարդիկ ու՞մ պետք է դիմեն, Փաշինյանի խոնակը պատասխանել է. «Օրենքը ծառայության պետի նշանակումից հետո նախատեսում է որոշակի ժամանակահատված ինստիտուցիոնալ ձևավորման, այդ թվում՝ տեղակայման, ինչպես նաև ծառայության գործառնական հարցերը կարգավորող ենթաօրենսդրական ակտերի ընդունման համար։ Ծառայությունը ֆունկցիոնալ դառնալուն պես նշված հարցերը կունենան պատասխաններ և անհրաժեշտ տեղեկությունը կտրամադրվի լրացուցիչ։ Իհարկե, ծառայության լիարժեք կայացման համար երկար ժամանակ հարկավոր կլինի»:
Հարցին, թե՝ վարչապետը ԱՀԾ ղեկավար է նշանակել Քրիստիննե Գրիգորյանին, ով զբաղեցնում էր Մարդու իրավունքների պաշտպանի պաշտոնը և ով չունի ոլորտի որևէ փորձառություն, արդյո՞ք ճիշտ թեկնածու է նման ծառայության ղեկավարի համար, Նազելի Բաղդասարյանը պատասխանել է. «Նոր ծառայության ղեկավարի առջև դրված է ժամանակակից մարտահրավերներին արդյունավետ արձագանքող հետախուզական ծառայություն ստեղծելու խնդիր, որը կունենա ամուր ինստիտուցիոնալ հիմք և կկարողանա սպասարկել ՀՀ կենսական շահերը։ Համոզված ենք, որ հանրային կառավարման ոլորտում Քրիստիննե Գրիգորյանի ունեցած փորձառությունը բավարար է նշված խնդիրները լուծելու համար»։