Վարդան Ղուկասյանն (Դոգ) այնքան ընդդիմադիր է, որ կողմ է Ավինյանի վերարտադրվելուն

Երևանի ավագանու ընտրություններում անցողիկ շեմը հաղթահարած և որպես ընդդիմադիր դիրքավորվոէ «Հանրային ձայն» կուսակցության նախագահ Վարդան Ղուկասյանը, որ լայն հանրությանը հայտնի է «Դոգ» անունով ու հայհոյախոսությամբ հագեցած լայվերով, գործնականում հայտարարել է Փաշինյանի կուսակից Ավինյանին սատարելու պատրաստակամության մասին:  
«Այս իրավիճակում Երևանի ավագանու ընտրությունների երկրորդ փուլ թույլ տալ չի կարելի, երբ ադրբեջանական զորքը կանգնած է Երասխում, երբ 100 հազար փախստական լցվել է Հայաստան, ու յուրաքանչյուր կոպեկը հաշիվ է»,-այս մասին հայտարարել է ավագանու ընտրություններին մասնակից «Հանրային ձայն» կուսակցության նախագահ Վարդան Ղուկասյանը, շեշտելով, թե՝  ինքն ավելի  նախընտրում է, որ նախկիները չամրապնդվեն, քան Ավինյանը չվերարտադրվի։
«Եթե նույնիսկ Սիսին (ինքն այդպես է անվանում Ավինյանին) վերարտադրվի, ապա օրենքը թույլ է տալիս մեկ տարի հետո անվստահություն հայտնել, ու ... անել։ Ես գնացի ինձ համար անընդունելի քայլի, ասեցի՝ Հայկո, ուզո՞ւմ ես քաղաքապետ դառնալ, օկեյ, մեկ վարչություն։ «Կամ ես եմ քաղաքապետ, կամ ոչ մեկ». Կրկնեց Նիկոլ Փաշինյանի բառերը։ Ես էլ պատասխանեցի՝ դու չես դառնա քաղաքապետ»,-ասաց նա։
Վարդան Ղուկասյանի՝ լայվում արած հայտարարություններին շտապել է արձագանքել 
Հայկ Մարությանի թիմակից Հակոբ Կարապետյանը, ով ֆեյսբուքյան գրառման մեջ նշել է. «Եթե չեք նկատել, երեկվա իր լայվով Վարդան Ղուկասյանը (Դոգ) վերջ դրեց ավագանու նոր ընտրությունների հետ կապված ինտրիգին։ Ընդդիմադիր խոսույթով ավագանում մանդատներ ստացած  Ղուկասյանի կուսակցութնունը այս իրավիճակում ըստ էության նպաստում է ՔՊ թեկնածուի քաղաքապետ դառնալուն։ Պարզ ասած՝ եթե ոչինչ չփոխվի, ապա Դոգը Ավինյան Տիգրանին դարձնում է քաղաքապետ։ Նույն կերպ, Հանրապետություն կուսակցությունը, թեեւ խորիմաստ լռություն է պահպանում, բայց այլ ցուցիչներից հստակ է, որ իրենք էլ են աջակցելու ՔՊ-ին»։
Եթե «Հանրային ձայնը» իսկապես միանա ՔՊ-ին, այսինքն՝ քվեարկեն Ավինյանի թեկնածության օգտին, ապա Երևանի քաղաքապետարանում վերարտադրվելու փաշինյանական ծրագիրը կարելի է համարել կատարված: Թե՝ ում միջոցով, ինչպես, արդեն էական չի: