ՌԴ-ն չի կարող օգնել ռուսական անձնագրից հրաժարված Ռուբեն Վարդանյանին. ՌԴ Դաշնային խորհուրդ
Լեռնային Ղարաբաղի նախկին պետնախարար Ռուբեն Վարդանյանի որոշումը՝ հրաժարվել ռուսական անձնագրից, իր անձնական ընտրությունն է, ուստի և Ռուսաստանը չի կարող օգնել նրան դուրս գալ ադրբեջանական գերությունից։ Այս մասին «Ռիա Նովոստի» գործակալությանն ասել է ՌԴ Դաշնային խորհրդի անդամ Ալեքսանդր Բաշկինը։
«Ինքը սեփական կամքով հրաժարվել է ՌԴ քաղաքացիությունից, և, ըստ այդմ, այդ քայլի բոլոր իրավական հետևանքներն իր ընտրության հետևանքն են։ Սրանով էլ պայմանավորված՝ ինքն այժմ չի կարող ստանալ ՌԴ օգնությունը», - ասել է նա։
Արցախի նախկին պետնախարար, գործարար Ռուբեն Վարդանյանն այսօր ադրբեջանական զինյալների կողմից գերեվարվել է Հաքարիի կամրջի մոտ, երբ փորձել է անցնել Լաչինի ապօրինի անցակետը։ Ադրբեջանում հաստատել են նրան ձերբակալելու փաստը ու հայտնել, որ նա տեղափոխվել է Բաքու։ ՀՀ ԱԳ նախարարությունն էլ իր հերթին հայտարարել է, որ պաշտպանելու է Վարդանյանի՝ իբրև ՀՀ քաղաքացու շահերը, ինչպես նաև կոչ արել ՌԴ-ին ու այլ միջազգային գործընկերներին օգտակար լինել այդ հարցում։
Աղբյուր՝ 24news.am
Հետևեք մեզ Facebook-ում