Հայաստանում պետք է ձեւավորվի նոր ժամանակավոր կառավարություն. զուգընթաց նախաձեռնենք կոմիտե. Թեւանյան․ Տեսանյութ

Հայաստանի ու Արցախի անվտանգությունը չի կարելի վստահել մարդկանց, որոնք պարբերաբար բերում են պատերազմ ու պարտություն: Այս մասին այսօր դեպի Հանրապետության հրապարակ շարժվելու ճանապարհին հայտարարեց «Մայր Հայաստան» դաշինքի քաղաքապետի թեկնածու Անդրանիկ Թևանյանը։

«Բոլորիդ կոչ եմ անում գալ Հանրապետության հրապարակ: Ես կներկայացնեմ իմ պատկերացումները ստեղծված իրավիճակների և ելքերի հետ կապված, կառաջարկեմ այն ճանապարհային քարտեզը, որով մենք պետք է հասնենք իշխանափոխության և այս իրավիճակի հանգուցալուծման», - հայտարարեց Անդրանիկ Թևանյանը՝ ևս մեկ անգամ կոչ անելով բոլորին հավաքվել Հանրապետության հրապարակում՝ Կառավարության շենքի դիմաց։

Նա նաև հավելել է, որ Հայաստանում պետք է ձեւավորվի նոր ժամանակավոր կառավարություն. Դրան զուգընթաց մենք նախաձեռնելու ենք համապատասխան կոմիտեի ձեւավորում, որը կառաջնորդի, կկառավարի եւ կկազմակերպի հանրության բոլոր գործողությունները եւ մենք միասնաբար կիրականացնենք այն փոփոխությունները, որոնց սպասում է մեր ժողովուրդը: 

«Այդ կոմիտեն պետք է վերցնի պատասխանատվություն՝ անցումային իրավիճակում երեւույթները եւ  գործընթացները կառավարելի պահելու համար»,-ասաց նա:

Թեւանյանը դիմեց Նիկոլ Փաշինյանին. «Նիկոլ Փաշինյան, անձամբ դիմում եմ քեզ, դու փախար ամբողջ ընտրարշավի ընթացքում, չերեւացիր աչքիս ու չմտար բանավեճի մեջ: Հիմա դու հնարավորություն ունես կատարելու քայլ, որը մեր երկիրը կարող է հետ պահել ցնցումներից: Հրաժարվիր պրահյան գործընթացից, հրաժարվիր Արցախն Ադրբեջանի մաս ճանաչելու հայտարարությունից եւ երրորդը, Հայաստանը պարտավոր է տեր կանգնի Արցախի անվտանգությանը: Արցախի անվտանգության ապահովումը Հայաստանի սահմանադրական հանձնառությունն է, եթե որեւէ ղեկավար դրանից հրաժարվում է, ապա դա պետական դավաճանություն է:

ՇՄենք կոչ ենք անում հրաժարվել այդ քաղաքականությունից եւ առանց ցնցումների, բախումների, քննարկել իշխանությունից հեռանալու հարցը եւ Հայաստանում ձեւավորել համախոհաբար նոր ժամանակավոր կառավարությունը»: