Իրանը պատրաստ է համատեղ զորավարժություններ անցկացնել դաշնակից երկրների հետ

Իրանի Իսլամական Հանրապետության զինված ուժերը պատրաստ են ընդլայնել ռազմական համագործակցությունը տարբեր ոլորտներում բարեկամ և դաշնակից բոլոր երկրների հետ։

Այս մասին հայտարարել է Իրանի բանակի հակաօդային պաշտպանության ուժերի հրամանատար, բրիգադային գեներալ Ալիռեզա Սաբահիֆարդը՝ Իրանի հակաօդային պաշտպանության ուժերի 15-ամյակի կապակցությամբ Թեհրանում օտարերկրյա ռազմական կցորդների հետ հանդիպման ժամանակ, գրում է mehrnews.com-ը:

Սաբահիֆարդն ասել է, որ Իրանի Իսլամական Հանրապետության զինված ուժերը բոլոր բարեկամ և դաշնակից երկրներին խաղաղության և բարեկամության ուղերձ են հղում:

Նա հավելել է, որ Իրանի Իսլամական Հանրապետության զինված ուժերը, հատկապես հակաօդային պաշտպանության ուժերը, պատրաստ են ընդլայնել տարբեր տեսակի ռազմական համագործակցությունը վարժանքների և համատեղ զորավարժությունների, տեխնիկական և օպերատիվ փորձի փոխանակման, ինչպես նաև բոլոր բարեկամ և դաշնակից երկրների հետ փոխադարձ հանդիպումների ոլորտում։

Աղբյուր՝ Tert.am