ՔՊ-Ավինյանը «խոդի է տվել» վարչական ռեսուրսի մշտական «սայլը»

Քաջարի վարորդ (ուղևորափոխադրման իրավունք տվող վարորդական կարգ չունենալու, բայց ուղևորներով «ԳԱԶել» վարելու իմաստով) Տիգրան Ավինյանը լիովին «խոդի է տվել» վարչական ռեսուրսը: Մեր մեջ ասած` այդ ռեսուրսը թե՛ Տ.Ավինյանը, թե՛ նրա ՔՊ-ն գործարկել էին դեռ ամիսներ առաջ և ինտենսիվորեն շահագործում էին: Խոսքն ինչպես Երևանի քաղաքապետի պաշտոնի հնարավորություններն օգտավործելով «փիարվելու» մասին է, այնպես էլ ու ոչ պակաս իր անմիջական ենթակաների՝ մայրաքաղաքի վարչական շրջանների ղեկավարների, նրանց աշխատակիցների միջոցով «վա՜յ, մեր պուպուշ, մեր աննման, մեր երկնային պարգև Ավինյան» թաղեթաղ իրականացվող գլխատար քարոզի մասին է: Այսպես կոչված՝ «թաղապետարանների» աշխատակիցներն ուղղակի զահլա էին տանում այդ գովաբանական պտույտներով, թե «տեսեք, ինչ սիրուն խաղահրապարակ սարքեցինք», «տեսեք, ինչ լավ ավտոբուսներ են բերել» (ըստ որում, խոշոր՝ մոտ 20 միլիոն եվրո պարտքով կամ վարկով) և այդպես շարունակ:

Այնուհանդերձ, Երևանի ավագանու ընտրարշավի քարոզարշավի մեկնարկին վարչական ռեսուրսի չարաշահման թափը կամ դրա մասին լրատվամիջոցներում հրապարակումները միանգամից աչքի զարնեցին:

Վերցնենք թեկուզ Ավինյանի «ինքնաբուխ» հանդիպումները Երևանի բնակիչների, իրականում՝ բերովի տատիկների ու ոչ տատիկների հետ: Է՜լ ՔՊ թեկնածուի վզով ընկնել, է՜լ «մեր թագավոր», է՜լ էս, է՜լ էն: Պարզ է, չէ՞, որ դա վարչական շրջանների ղեկավարներն են ջանացել, վարձել են «3 մանեթանոց» գովաբանողներ, ու տեսախցիկների առաջ «թատրոն» են ցուցադրում: Դե, ՔՊ-ն այն խմբակն է, որը հանրության վրա պատերազմի հերոսի կեղծ պապ է սաղացրել, մի երկու տատիկն ի՞նչ է, որ չբերի ու իր քաղաքապետացու Ավինյանի պարանոցով չգցի:

Ի դեպ, Տ.Ավինյանին արժե հուշել, որ առաջիկայում նրան փաթաթվող տատիկ-պապիկները խուսափեն «թագավոր ջան» արտահայտությունից, հակառակ դեպքում Փաշինյանը կնախանձի՝ դրանից բխող ասֆալտածեփման և հիստերիկայի այլ դրսևորումներով:

Սակայն, կան ավելի հետաքրքրական տեղեկություններ: Օրինակ, «Ժողովուրդ»-ը գրեց, որ իրենց տեղեկություններով՝ ՔՊ-ական բոլոր պատգամավորներին և ավագանու ցուցակի անդամներին հրահանգվել է ակտիվորեն մասնակցել քարոզարշավին, կրնկակոխ ուղեկցել Ավինյանին, «մարդ բերել»: Ուսումնական տարվա մեկնարկն էլ լիովին համընկնում է քարոզարշավի ընթացքի հետ, այնպես որ՝ մարդ էլ կբերեն, աշակերտներ էլ, ծնող էլ կկանչեն:

Ամենից կարևորը՝ պաշտոնյաներին հանձնարարվել է «աշխատել» Ավինյանի համար:

Ոչ պակաս հետաքրքրական է այն տեղեկությունը, թե ՔՊ-ն 800 հազար դոլարի նախընտրական տեսահոլովակներ է պատվիրել «Շարմ» ընկերությանը:

Սա, առաջին հերթին հետաքրքրական է նրանով, որ եթե թերթի հրապարակման մեջ նշված փաստերը հաստատվեն, ապա դա բավարար հիմք է, որպեսզի մյուս թեկնածու ուժերը ԿԸՀ-ից պահանջեն չեղյալ ճանաչել այս ընտրություններին ՔՊ-ի մասնակցության գրանցումը և իշխանական ուժը դուրս հանեն ընտրապայքարից՝ նախատեսված առավելագույնը գերազանցող քարոզչական ծախսեր անելու հիմնավորմամբ:

Ըստ որում, նշենք՝ կարող եք չկասկածել, որ ՔՊ-ական ԿԸՀ նախագահը դեռ նոր է մեկնարկել, առջևում դեռ լինելու են դրսևորումներ ու չարաշահումներ: Թեպետ, կարելի է ամենևին չկասկածել, որ ՔՊ-ական ԿԸՀ նախագահը, առանց հոնքը շարժելու, կհայտարարի, որ ոչ մի խախտում էլ չկա, որ ամեն ինչ «օրենքով» է ու նման բաներ:

Գործնականում ՔՊ-ն, անկախ այն բանից, թե որքան քվե կստանան կամ «կգնեն», արդեն պարտված է: Իրենք էլ հասկանում են, որ ոչինչ չունեն առաջարկելու:

Արթուր Խայթ

Աղբյուր՝ 7or.am