Ադրբեջանում 300 անձի վերաբերյալ կա ցուցակ, որոնց դիտում են որպես ռազմական հանցագործներ. Եթե փորձեն դուրս գալ Արցախից՝ կձերբակալվեն. Պետրոսյան. Տեսանյութ

Ադրբեջանի կողմից ամեն օր նոր ագրեսիվ հայտարարություններ են իրականացվում այն տարբերակով, որ փորձելու են հետագայում ոչ թե մեծ պատերազմի, այլ առանձին ճակատամարտերի, փոքրիկ ընդհարումների միջոցով կտոր-կտոր Հայաստանից սահմաններ գրավել։ Պրովոկացիոն գործողությունները ոչ միայն սահմանների խախտումներն են, այլև մեր տարածքից զինվորների առևանգումը, սահմանակետից Արցախի բնակչին ձերբակալելը, ադրբեջանական զինուժի կողմից իրականացվող կրակոցները և այլն։ «ՓաստԻնֆոյի» եթերում ասել է արդարադատության գեներալ-մայոր Թաթուլ Պետրոսյանը։

Անդրադառնալով ՀՀ-ի կողմից ՄԱԿ ԱԽ ուղղված դիմումին՝ բանախոսը նշեց, որ երեք ամիս կլինի, ինչ Հաագայի միջազգային դատարանը որոշում է կայացրել Լաչինի միջանցքի ապաշրջափակման մասին, սակայն ոչինչ չարեցին։ «Մեր վերլուծությունները ցույց են տվել, որ ադրբեջանական այս ագրեսիան, Թուրքիայի ներկայությունը Կովկասում, հատկապես՝ Հայաստանում, ապահովում են անգլոսաքսոնական ուժերը, Ամերիկայի կողմից՝ Ռուսաստանին դուրս մղելու նկատառումից ելնելով։ Կարծում եմ, տա Աստված, որ սխալվեմ, ԱԽ-ում՝ ի դեմս Մեծ Բրիտանիայի, վետոյի իրավունք կկիրառվի»,- ասել է Թ. Պետրոսյանը։

Բանախոսի արձանագրմամբ՝ արցախահայերի շրջափակումը մարդկության դեմ հանցագործություն է, որը Ադրբեջանն սկսել է 2020թ. 44-օրյա պատերազմի ժամանակ։ Սպասել որ դատախազությունը քրեական վարույթ հարուցի՝ չի լինի այդպես։ Ադրբեջանում արդեն 300 անձի վերաբերյալ կա ցուցակ, որոնց դիտում են որպես ռազմական հանցագործներ։ Եթե փորձեն Հաքարիի կամրջով գաղթել Հայաստան՝ նրանք ֆիլտրացիա են անելու, տղամարդկանց մոտ 90 տոկոսին թույլ չեն տալու դուրս գալ Արցախից և ձերբակալելու են։ Սրանք թքած ունեն միջազգային կառույցների գործողությունների, միջազգային կառույցի հեղինակության վրա։ Չէ՚ որ միջազգային կառույցները պետք է ենթադրենք, որ ղեկավարվում են մեկ կենտրոնով՝ մեկ կենտրոնը Արևմուտքն է, որի վերջնական քաղաքականությունն է՝ Ռուսաստանը դուրս բերել Արցախից։

Փորձագետի դիտարկմամբ, տարածքային ամբողջականություն խախտելը պետական հանցագործություն է։ Հողային տարածքների հետ կապված փոփոխությունը պետք է իրականացվի ըստ Սահմանադրության՝ հանրաքվեի միջոցով։ Հիշենք, որ Սյունիքում զորքերի հետ քաշման հրաման Ն. Փաշինյանը տվեց, որի արդյունքում թուրքերը առանց մի կրակոցի մտնում են Հայաստանի տարածք։ Սա պետական հանցագործություն է իշխանությունների կողմից։ Այս իշխանությունների, հատկապես վարչապետի վերաբերյալ քրեական գործերի հարուցումը 20 և ավելի հոդվածներով է լինելու՝ պետական դավաճանություն, տարածքային ամբողջականության խախտում, կոռուպցիա և այլն։

Մանրամասները՝ տեսանյութում։