ՀՀ ՊՆ-ն հայտնում է, որ ադրբեջանցիները կրակել են ԵՄ դիտորդների ուղղությամբ։ ԵՄ առաքելությունը հերքում է, սակայն կա հակառակն ապացուցող տեսանյութ։ Ի՞նչ է կատարվում. Տեսանյութ

Երեքշաբթի՝ օգոստոսի 15-ին, Հայաստանի պաշտպանության նախարարությունը հայտարարել է այն մասին, որ նույն օրը՝ ժամը 12:20-ի սահմաններում, Ադրբեջանի ԶՈւ ստորաբաժանումները հրաձգային զենքից կրակ են բացել Վերին Շորժայի ուղղությամբ պարեկություն իրականացնող ԵՄ դիտորդների և նրանց պատկանող ավտոմեքենայի ուղղությամբ:

Նշվում էր նաև, որ տուժածներ չկան:

Որոշ ժամանակ անց Հայաստանում ԵՄ դիտորդական առաքելությունը հերքել է ՊՆ հայտարարությունը: 

«Դիտորդություն իրականացնող ԵՄ ոչ մի պարեկ կրակոցի թիրախում չի հայտնվել»,–ասված էր հայտարարության մեջ։

Նշվում էր, որ իրենք պարեկություն են անում հայ-ադրբեջանական սահմանամերձ շրջաններում և ռազմական զարգացումների, այդ թվում՝ իրենց պատասխանատվության գոտում կրակոցների մասին զեկուցում են Բրյուսել։

ԵՄ առաքելության հերքումից կարճ ժամանակ անց համացանցում հայտնվում է տեսանյութ, որում առաքելության անդամներից մեկը պատմում է այն մասին, թե ինչպես է ադրբեջանական կողմը կրակել այն դիրքերի վրա, որտեղ գտնվում էին ԵՄ դիտորդները։

Տեսանյութի հրապարակումից որոշ ժամանակ անց Հայաստանում ԵՄ դիտորդական առաքելությունը նախ ջնջեց իր նախորդ հաղորդագրությունը, թե ՀՀ ՊՆ-ն կեղծ տեղեկություններ է տարածում առաքելության ներկայացուցիչների ուղղությամբ կրակոցների մասին։

Իսկ դրանից հետո Հայաստանում ԵՄ դիտորդական առաքելությունը, այնուամենայնիվ, հայտարարեց, որ դիտորդների պարեկային խումբը «ներկա է եղել կրակոցների գոտում»։

Zham.am