«Ապագան» եկել էր Գառնու տաճար

«Գառնի» պատմամշակութային արգելոց-թանգարանի տարածքում Triangulum Community ընկերության և ԿԳՄՍ նախարարության աջակցությամբ հուլիսի 8-ին տեղի է ունեցել երեկույթ։ Միջոցառմանը որպես հյուր ներկա էր հայտնի ֆրանսիացի DJ և պրոդյուսեր Սեբաստիան Լեժեն (Sébastien Léger), ինչպես նաև հայտնի հայ DJ–եր: Տոմսերը վաճառվել են 15 000 ՀՀ դրամով, իսկ Triangulum Community ընկերության կայքում նաև նշվում է, որ բոլոր տոմսերը վաճառված են։

Այս միջոցառումը միանշանակ չի ընդունվել հայ հասարակության կողմից և քննադատության է արժանացել։ Մասնավորապես, տելեգրամյան ալիքներից մեկում անդրադարձ է կատարվել միջոցառմանը և ընդգծվել, որ միջոցառմանը թմրանյութ է օգտագործվել, իսկ մասնակիցներն անբարո վարք դրսևորել և պղծել տարածքը։

Բացի այդ հասարակության արդարացի դժգոհությունը պայմանավորված է նրանով, որ միջոցաառումն անցկացվել է ԿԳՄՍ նախարարության աջակցությամբ։ Օգտատերերը նշում են, որ Նիկոլ Փաշինյանի գլխավորած կառավարության նախարարnւթյունը աջակցում է նման միջոցառումների կազմակերպմանը, սակայն մերժում է ցանկացած բան, ինչը վերաբերվում է ազգային կրթությանը (Հայոց պատմության դասագրքերում պատմության խեղաթյուրում, պայքար Հայոց լեզվի և Հայ գրականության դեմ, Հայոց եկեղեցու պատմություն առարկան հանում են դպրոցական ծրագրից և այլն), ազգային մշակույթին՝ թափ առնող պայքար խաչքարերի դեմ, պայքար ազգային խորհրդանիշների դեմ (Արարատ բիբլիական լեռից՝ մինչ ՀՀ զինանշան և այլն)։

Օգտատերերը հեգնում են նախարարությանը, նշելով, որ ԿԳՄՍ–ն կարող է նաև թույլատրել նման միջոցառումների անցկացումը, օրինակ, «Էրեբունի» պատմահնագիտական արգելոց-թանգարանում (հիշեցնելով սկանդալային դեպքը, երբ արգելոցի տարածքում արված պոռնոգրաֆիկ բնույթ կրող տեսանյութ էր հրապարակվել), եզդիական Զիարատ տաճարում, Կապույտ մզկիթում Երևանում և այլ սրբավայրերում։

Հիշեցնենք, որ սա առաջին անգամը չէ, երբ ներկայիս իշխանությունները թույլատրում են նման միջոցառումների անցկացում «Գառնի» պատմամշակութային արգելոց-թանգարանի տարածքում։ Հայաստանի դե ֆակտո կառավարությունը 2019 թ․–ին կառավարության նիստերից մեկում հավանություն էր տվել Triangulum Community ընկերության հետ համատեղ «Գառնի» պատմամշակութային արգելոց-թանգարանի տարածքում կազմակերպել էլեկտրոնային երաժշտության փառատոն:

Zham.am