Գևորգ Պապոյանը սուրճի բաժակ է նայե՞լ, Մակրոնի խոսքերը Ելիսեյան պալատը չի հերքել․ Արթուր Խաչատրյան

Պ-ական պատգամավոր Գևորգ Պապոյանը սուրճի բաժակ է նայե՞լ, որտեղի՞ց որոշեց։ ԱԺ-ում լրագրողների հետ ճեպազրույցում, ըստ tert.am-ի՝ այսպես արձագանքեց «Հայաստան» խմբակցության պատգամավոր Արթուր Խաչատրյանը՝ պատասխանելով իշխանական պատգամավորի մեղադրանքներին, ըստ որի՝ ՀՅԴ-ն է Մակրոնի հայտարարության վերաբերյալ ապատեղեկատվություն տարածել։

ՀՅԴ անդամի խոսքով՝ այդ մասին շատերն են խոսել, այդ թվում՝ ֆրանսիացի պատգամավորներից մեկը, իսկ իշխանությունը բովանդակությունը թողել և ձևի հետևից է ընկել։

«Մակրոնն ասել է, որ ինքը պաշտպանում է Արցախի շահը, իսկ Փաշինյանը ոչ մի բան չի անում։ Դրա մասին խոսել է նաև Ժոզեպ Բորելը, ԵԽԽՎ նախագահը, բոլորն էլ ասում են, որ Փաշինյանը ձեռքերը լվացել է Արցախից։ Հիմա էլ ասում են՝ Դաշնակցությունն է արել։ Իրենք են մեղավորը», – պարզաբանեց նա։

Արթուր Խաչատրյանի համոզմամբ՝ եթե Մակրոնը Փաշինյանի մասին նման բան ասած չլիներ, պաշտոնապես կհերքվեր, բայց այդ խոսքերի մերժումը Ելիսեյան պալատից չի եղել։ Հիշեցնենք, որ Մարսելի հայ համայնքի ներկայացուցիչների հետ հանդիպման ժամանակ, որին ներկա էր նաև Ֆրանսիայի Ազգային ժողովի պատգամավոր Սաբրինա Ակրեսթի-Ռուպաշը, ՀՅԴ Արևմտյան Եվրոպայի ԿԿ ներկայացուցիչ Հրաչ Վարժապետյանը դիմել է Ֆրանսիայի նախագահ Մակրոնին՝ ասելով․ «Պարոն նախագահ, Արցախի շրջափակման և ադրբեջանական ագրեսիայի դեմ Ձեզնից ակնկալում ենք առավել ազդու նախաձեռնություն, գործնական և ոչ թե միայն բարոյական»։

Ի պատասխան Մակրոնն էլ հայտարարել է․ «Ես Ալիևիի վրա ավելի շատ ճնշում եմ գործադրել և ավելի շատ ճնշում եմ գործադրելու, քան Փաշինյանը։ Հարցը Փաշինյանն է։ Ես Արցախի հարցով միակն եմ, որ հստակ կեցվածք և պատգամ ունեմ»։