Բարձր ենք գնահատում ԱՄՆ ջանքերը հայ-ադրբեջանական հարաբերությունների կարգավորման գործում. Ալիեւը՝ Բայդենին

Ադրբեջանի նախագահ Իլհամ Ալիեւը շնորհավորական նամակ է ուղարկել ԱՄՆ նախագահ Ջո Բայդենին հուլիսի 4-ի՝ ԱՄՆ անկախության օրվա առիթով։ Այս մասին տեղեկացրել են ադրբեջանական ԶԼՄ-ները։

Ադրբեջանի նախագահն ի թիվս այլոց ընդգծել է «արդյունավետ համագործակցությունն էներգետիկ ոլորտում» եւ աջակցությունը Բաքվի եւ Երեւանի հարաբերությունների կարգավորմանը։

«ԱՄՆ-ն բոլոր փուլերում վճռականորեն եւ հետեւողականորեն աջակցել է Ադրբեջանի էներգետիկական ռազմավարությանը։ Մենք հատկապես գնահատում ենք մեր երկրների սերտ համագործակցությունն էներգետիկ անվտանգության ապահովման գործում, ԱՄՆ համակողմանի աջակցությունը մեր կողմից իրականացվող մասշտաբային տրանսազգային նախագծերին։

Ներկայում ձեւավորվել են նպաստավոր պայմաններ Հարավային Կովկասում կայուն խաղաղության հաստատման համար։ Մենք բարձր ենք գնահատում ԱՄՆ ջանքերը հայ-ադրբեջանական հարաբերությունների կարգավորման գործում, խաղաղության պայմանագրի պատրաստման գործընթացում՝ միջազգային իրավունքի նորմերի եւ սկզբունքների հիման վրա»,-նշվել է շնորհավորանքում։

Աղբյուր՝ NEWS.am