Հաջորդ շաբաթ Վաշինգտոնում կկայանա ՀՀ և Ադրբեջանի ԱԳ նախարարների հանդիպումը. Փաշինյան. Տեսանյութ

Հայաստանի ու Ադրբեջանի ԱԳ նախարարների հանդիպումը կկայանա հաջորդ շաբաթ, կառավարության նիստում հայտարարեց  Նիկոլ Փաշինյանը։

Նա պնդեց՝  պետք է գործարկվի Բաքու-Ստեփանակերտ երկխոսության միջազգային մեխանիզմը, որի շրջանակներում կհասցեագրվի ԼՂ հայության իրավունքների ու անվտանգության հիմնախնդիրը։

Ինչ վերաբերում է Հայաստան-Ադրբեջան հարաբերություններին՝ նա ասաց, թե  հայկական կողմի դիրքորոշումը շարունակում է մնալ նույնը՝ բոլոր ջանքերը պետք է գործադրել խաղաղության հաստատման և հարաբերությունների կարգավորման պայմանագիր կնքելու համար։

«Հաջորդ շաբաթ Վաշինգտոնում տեղի է ունենալու Հայաստանի ու Ադրբեջանի ԱԳ նախարարների հանդիպումը։ Մեր  պատվիրակությունն ԱՄՆ է մեկնում հենց այս տրամադրվածությամբ»,- ասաց նա։

Հայաստանն Ադրբեջանին առաջարկել է նաև անցկացնել սահմանագծման հանձնաժողովի նիստ. սկզբունքային պատրաստակամություն կա։

«Հայաստանը պատրաստ է նաև օր առաջ տարածաշրջանի տրանսպորտային ու տնտեսական ուղիների ապաշրջափակմանը՝ կողմերի ինքնիշխանության, իրավազորության ու փոխադարձության սկզբունքների ներքո»,- հավելեց նա։