Եվրասիական զարգացման բանկը սկսում է Վերին Լարսի ընդլայնման ծրագիր

Եվրասիական զարգացման բանկը սկսում է Վերին Լարս անցակետի ենթակառուցվածքների ընդլայնման ծրագիր: Այդ նպատակով կներդրվի 200 մլն դոլար։ Վերին Լարս անցակետի ընդլայնման ծրագրի առաջին փուլը 15-20%-ով կավելացնի դրա թողունակություանը, լրագրողներին ասել է Եվրասիական զարգացման բանկի (ԵԱԶԲ) վարչության փոխնախագահ Դենիս Իլինը, հայտնում է ԵԱԶԲ-ի մամուլի ծառայությունը:

Այդ նպատակով արդեն իսկ ստորագրվել է համագործակցության հուշագիր «КАВКАЗ.РФ» բաժնետիրական ընկերության հետ, որը ստեղծվել է 2010-ին Հյուսիսկովկասյան դաշնային շրջանի զբոսաշրջային և հանգստի հատուկ տնտեսական գոտիներիկառավարման համար: Ծրագրի շրջանակում նախատեսվում է կառուցել 350 մեքենայի համար նախատեսված անվտանգ կայանատեղի, հյուրանոց, մաքսային ծառայությունների և սպասարկման կազմակերպությունների տեղակայման մոդուլային գրասենյակային շենք, ավտոմեքենաների տեխնիկական սպասարկման գոտի, բենզալցակայաններ, էլեկտրական մեքենաների լիցքավորման գոտի, տուրիստական տեղեկատվական կենտրոն, խանութներ, սրճարաններ և այլն: Կկառուցվի նաև բազմաֆունկցիոնալ մեծածախ բաշխման կենտրոն, որը կապահովի մշտապես պահպանվող ջերմաստիճանային ռեժիմով սննդամթերքի պահեստավորում։

«Վերնի Լարսի» միջազգային ավտոմոբիլային անցակետը և երթուղին Հայաստանի համար ներկայումս միակ ցամաքային ճանապարհն է, որով Հայաստանը առևտրային կապեր ունի ԵԱՏՄ անդամ մյուս երկրների հետ։ Բացի այդ, «Վերնի Լարս» անցակետով ուղևորներ և բեռներ են փոխադրվում Բելառուսի, Վրաստանի, Ռուսաստանի և Թուրքիայի միջև։ Ուղևորահոսքի և բեռնափոխադրման ծավալը վերջին մեկ տարվա ընթացքում զգալիորեն աճել է։

Այժմ էլ «Վերին Լարսի» անցակետում ընթանում են արդիականացման աշխատանքներ, որոնք կավարտվեն 2022 թվականին: Սպասվում է, որ այդ մաքսային ենթակառուցվածքի թողունակությունը կբարձրանա 6,5 անգամ` օրական մինչև 2 650 բեռնատար ավտոմեքենա՝ հնարավորությամբ ընդլայնելու մինչև 3 հազար ավտոմեքենա: