Թուրք-ադրբեջանական լոբբիստ Լեո Դոքերթիի այցը Հայաստան, մեղմ ասած, շատ վատ նշան է

ՀՀ իշխանությունների կողմից Արցախը հանձնելու պատրաստակամությանը զուգահեռ կտրուկ ակտիվանում է, այսպես կոչված, «արևմտյան» վեկտորը Հայաստանի շուրջ՝ Մեծ Բրիտանիայի Եվրոպայի հարցերով պետական նախարար Լեո Դոքերթիի՝ Հայաստան անսպասելի այցի տեսքով: 

Առեղծվածային զուգադիպությամբ նույն օրը Հայաստանում հայտնվում են ԱՄՆ պաշտպանության դեպարտամենտի ներկայացուցիչներ գեներալ-մայոր Քիթ Ֆիլիփսին և Պատրիկ Պրայորին։ Սակայն այս պարագայում, ավելի կարևոր է հասկանալ բրիտանացի նախարարի այցի նպատակները։ Հա ի՞նչ՝ կասի հասարակ մարդը, "подумаешь" ինչ-որ նախարար է «դրսերից» գալիս Երևան։ Սակայն պետնախարար Դոքերթիի այցն այդ դեպքը չէ։ Մինչ մենք հասկանանք, թե ինչի մասին է խոսքը, պետք է կանգ առնել այն հանգամանքի վրա, թե ով է իրականում Լեո Դոքերթին: 

Կարծում եմ, մեզ համար կարևոր պետք է լինի այն հանգամանքը, որ նախարար Դոքերթին, ըստ էության, թուրք-ադրբեջանական տանդեմի շահերի գլխավոր բրիտանական լոբբիստներից մեկն է և ըստ այդմ՝ Բրիտանիայում խիստ հակահայկական ալիևյան ռեժիմի քարոզիչն ու պաշտպանը: Դոքերթին երբեք չի թաքցնում, որ մշտապես կատաղի պաշտպանում է թուրք֊ադրբեջանական շահերը բոլոր հնարավոր հարթակներում։ Իրականում Դոքերթիի այցը հիմնականում միտված է լինելու առավելագույնս խթանել փաշինյանական իշխանություններին Հայաստանի և Արցախի համար Ադրբեջանի հետ «ինքնասպանության» պայմանագիր ստորագրելուն, քանի որ մայիսի 25-ին Մոսկվայում Փաշինյան-Պուտին-Ալիև հանդիպման նախաշեմին տրանսատլանտյան վեկտորը չի կարող թույլ տալ "խաղաղության պայմանագրի" ադրբեջանամետ տարբերակի տապալումը։ 

Իսկ հաշվի առնելով այն հանգամանքը, որ Ադրբեջանին Արցախը հանձնելու ներկայիս հայաստանյան իշխանությունների որոշումը լրիվ համապատասխանում է անգլո-սաքսոնական ծրագրին, ապա ամեն ինչ ավելի քան պարզ է: Քանզի դիտարկվում է Արևմուտքի կողմից, որպես պատմական շանս կտրուկ նվազեցնել ռուս-իրանական ազդեցությունը Հարավային Կովկասում։ 

Ինչեւէ, արևմտյան ուժային կենտրոնները կարծում են, որ Մոսկվայում կարող է վտանգվել թավշիստների կողմից Արցախի հանձման հակահայկական նախագիծը, և հետևաբար Հայաստանում ռուս-իրանական ազդեցության հնարավորինս թուլացման գործընթացը։ Եւ հենց այս պատճառով նախարար Դոքերթին ենթադրաբար խնդիր ունի շատ կոշտ զգուշացնել Հայաստանի ներկայիս իշխանություններին, որ հանկարծ չփորձեն հրաժարվել թուրքամետ ու ադրբեջանամետ կուրսից, թե չէ վերջիններիս համար լուրջ խնդիրներ կառաջանան։ 

Կարելի է նաև ենթադրել, որ նախարար Դոքերթին երեւանյան այցի ժամանակ ուղիղ հրահանգներ կտա հայաստանյան իշխանական վերնախավի իր գաղափարական «զինակիցներին», թե ինչպես վարվել, որպեսզի արևմտյան նախագիծը («Հայաստանի և Արցախի ոչնչացումը Հարավային Կովկասում՝ լոգիստիկ ուղիների վերահսկման դիմաց») հարթ ընթանա։ 

Մի խոսքով, թուրք֊ադրբեջանական լոբբիստ Լեո Դոքերթիի այցը Հայաստան, մեղմ ասած, շատ, շատ, շատ վատ նշան է։ 

ՀԳ Համաձայն պաշտոնական լրահոսի, Հայաստանը և Բրիտանիան սկսում են «ռազմավարական» համագործակցության շուրջ բանակցությունները։ 

Արման Աբովյան

Աղբյուր՝ «Հրապարակ»