«Հանրային հեռուստաալիքով նսեմացվեց հայ մշակույթի բարձրագույն արժեքը՝ Կոմիտասը». Վան Եղիազարյանը անդրադարձել է Սուպեր Սաքոյի սկանդալային հայտարարությանը

«Նեմրա» ռոք-խմբի մենակատար Վան Եղիազարյանը ֆեյսբուքյան իր էջում գրել է. «Հայաստանի հանրապետության առաջին ալիքով նսեմացվեց հայ մշակույթի բարձրագույն արժեքը՝ Կոմիտասը: Վերջերս կարդացի՝ Թուրքիայում դատի են տվել մի աղջիկ բլոգերի, որն իր «Ինստագրամ»-ի ուղիղ եթերում թուրքական լիրան, որի վրա Աթաթուրքի նկարն ա, գցել էր զուգարանը, 7 տարվա ազատազրկում ա սպառնում: Էս համեմատությունը հազարավոր օրինակներից մեկն ա, որ էն ամենը ինչ կատարվում ա մեզ հետ համաչափ ա ու տրամաբանական»:

Նշենք, որ մայիսի 14-ին Հանրային հեռուստաընկերությունով հեռարձակվող «Կադրից դուրս» հաղորդման շրջանակներում երգիչ, ռեփեր Սուպեր Սաքոն անդրադարձել է Կոմիտասի մշակույթին եւ պնդել, որ մուղամը հայկական է, եւ ոչ մի կապ չունի մեր հարեւան պետությունների մշակույթի հետ: Ինչը մեծ վրդովմունք եւ զայրույթ է պատճառել հանրությանը:

«Մուղամը մերն է եղել: Կոմիտասը եկել և մաքրել է դա, քանի որ, երբ մատուցել է այդ երաժշտությունը Եվրոպային նրանք չեն հասկացել այդ նոտաները, իսկ ինքը հայ երգը տարածելու համար եկել ու ջնջել է այդ նոտաները, ես գիտեմ այդ պատմությունը և պարզապես տարածելու համար նա ջնջել է նման նոտաները, բայց ռաբիսը միշտ մերն է եղել»,- ասել է նա:

Zham.am