Դպրոցականներին ծեծի ենթարկողը մեղքն ընդունել է

Անցյալ շաբաթ մամուլն ահազանգեց հերթական սկանդալային դեպքով՝ որ Նոր Նորք համայնքում գտնվող Միկոյանի անվան թիվ 166 հիմնական դպրոցում կռիվ է եղել։ 8-րդ դասարանցի մի տղա աղջիկներից մեկի հետեւից բարձրաձայն խոսք էր գցել, նրա եղբայրներն էլ եկել էին ու պատիվ պահանջել տղայից։ Վերջինիս հայրն էլ, ըստ տարածված տեղեկությունների, թիկնապահներով եկել էր դպրոց՝ երեխային պաշտպանելու, ու ծեծի ենթարկել աղջկա եղբայրներին եւ այլ դպրոցականների: Դպրոցի տեսախցիկներից հանված կադրերը տարածվել են համացանցով մեկ:

Առաջին օրը լուր տարածվեց, թե դպրոց ներխուժած տղամարդը պաշտոնյա է, որը թիկնապահներ է պահում: Մեր տեղեկություններով, սակայն, նա պաշտոնյա չէ եւ դպրոց է եկել իր ընկերների հետ:

Երեկ Քննչական կոմիտեն հայտնեց, որ երկու անչափահասներից մեկը ստացել է քթի կոտրվածք, մյուսը՝ կզակի ու լեզվի վնասվածքներ: Նաեւ հայտնեց, որ տղամարդուն մեղադրանք է առաջադրվել խուլիգանական դրդումներով անչափահասի առողջությանը միջին ծանրության վնաս պատճառելու, խուլիգանական դրդումներով անչափահասի նկատմամբ ֆիզիկական ներգործության եւ մի խումբ անձանց կողմից խուլիգանության համար։ Քննիչը կալանք է պահանջելու: Մեղադրյալն ընդունել է մեղքը, սակայն չի ասել, թե ովքեր են եկել իր հետ դպրոց: ՔԿ-ն հայտնում է, որ նրանց անձը պարզված չէ։

Միջադեպի մասին դպրոցում ամենատարբեր լուրերն են պտտվում: Ոմանք մեղադրում են տղային, որը, փաստորեն, իր հորը խուլիգանության է դրդել, մյուսները՝ աղջկան: Առանց անուններ հայտնելու ասում են, որ սա այդ աղջնակի մասնակցությամբ միակ դրվագը չէ, որ նա էլի է նման պատմությունների մեջ ընկել, եւ նույնիսկ նրան դպրոցից հեռացնելու հարց է դրվել: Թիվ 166 դպրոցի տնօրեն Մարգարիտա Քուշկյանը հայտնի բժիշկ, «Էրեբունի» ԲԿ սեփականատեր Արտյոմ Քուշկյանի քույրն է: Մենք փորձեցինք նրա հետ զրուցել, սակայն մեզ հայտնեցին, որ տնօրենը Երեւանում չէ: Փոխտնօրենին էլ մի քանի անգամ զանգահարեցինք, սակայն նա մեր զանգերին չպատասխանեց:

Աղբյուր՝ «Հրապարակ»