Դիմում եմ ոստիկանության սպայական կազմին՝ սովորեցրեք ձեր ենթականերին, թե ինչպիսի վարքագիծ պիտի դրսևորի ոստիկանը ազգային, պետական խորհրդանիշների նկատմամբ
Ազատության հրապարակում մայիսի 9 -ի հանրահավաքի ժամանակ երբ հնչում էին Հայաստանի և Արցախի Հանրապետության պետական օրհներգները, հարթակից տեսնում էի ձեռքերը սրտին դրած կանգնած հարյուրավոր մասնակիցների, նույն վայրում քայլող 2 կիլոգրամանոց ծամոնը բերանում հեգնական ժպիտով "բարձրաճաշակ" ինչ-որ մարդկանց, միևնույն ժամանակ զգաստ կանգնած բազմաթիվ ոստիկանների ու նրանց կողքին ուրիշ ոստիկանների, որոնք հիմնի երաժշտության ներքո քչփորում էին իրենց հեռախոսները։
Քաղաքացիական անձը կարող է չունենալ պետական մտածողություն և չհասկանալ ազգային խորհրդանիշների արժեքը, կարող է ծամոնով որոճալ իր պետության օրհներգի ժամանակ, բայց եթե դա անում է ոստիկանության ծառայողը՝ իրավակարգի զինվորը, ով պարտավոր է հարգել ու պաշտպանել ազգային խորհրդանիշները, ապա դա արդեն համակարգի մահվան ցուցիչ է։
Հարգելի ոստիկաններ, կրելով համազգեստը և կրծքին ունենալով Հայաստանի գերբը՝ դուք պարտավոր եք հասկանալ ձեր պետականության արժեքը, ու եթե դուք եք անհարգալից վերաբերմունք ցուցաբերում ձեր, մեր պետականության նկատմամբ, ապա նույնպիսի վերաբերմունք առաջանում է հենց ձեր նկատմամբ։
Դիմում եմ ոստիկանության սպայական կազմին՝ սովորեցրեք ձեր ենթականերին, թե ինչ է նշանակում ազգային հիմն և ինչպիսի վարքագիծ պիտի դրսևորի ոստիկանը ազգային, պետական խորհրդանիշների նկատմամբ։
Նաիրի Հոխիկյանի ֆեյսբուքյան էջից
Հետևեք մեզ Facebook-ում