«Ա» ստորաբաժանման առաջին պետը

«Ա» ՍՏՈՐԱԲԱԺԱՆՄԱՆ ԱՌԱՋԻՆ ՊԵՏԸ

Պահեստազորի գնդապետ Վարազդատ Գուրգենի Դալիբալթայանը պետանվտանգության մարմիններում կյանքի ու ծառայության նշանակալի ուղի անցած սպա է, զինվորական ականավոր գերդաստանի շառավիղ, հայկական բանակի կայացման գործում անուրանալի ներդրում ունեցած գեներալ-գնդապետ Գուրգեն Դալիբալթայանի որդին:

Ծնվել է 1954-ին, Էջմիածին քաղաքում: Պայմանավորված ընտանիքի գլխավորի հաճախակի փոխվող ծառայության վայրերով` նախնական կրթությունը ստացել է Ադրբեջանի և Ռուսաստանի միջնակարգ ուսումնական հաստատություններում:

1972-1977 թվերին ուսանել է Կրասնոյարսկի (Ռուսաստան) պոլիտեխնիկական ինստիտուտում։ Ուսումնառությունից հետո վերադարձել է Հայաստան, աշխատանքի անցել ըստ ձեռք բերած ինժեներ-շինարարի մասնագիտություն: Չորս տարի անց Վ. Դալիբալթայանը կյանքն ամբողջ 37 տարով կապել է պետանվտանգության մարմինների հետ:

1981 թվականին աշխատանքի անցնելով հայաստանյան պետանվտանգության կառույցում՝ ուսման է գործուղվում է ԽՍՀՄ ՊԱԿ-ի Մինսկի բարձրագույն կուրսեր։ Վերադառնալով՝ անցնում է օպերատիվ աշխատանքի`այն զուգակցելով ՀԽՍՀ ՊԱԿ-ի կազմում նվիրյալների նախաձեռնությամբ կազմավորված ահաբեկչության և կազմակերպված հանցագործության ու բանդիտիզմի դեմ պայքարող խմբի գործունեությանը, որը գործում էր արտահաստիքային հիմունքներով։ Աշխատանքի որակական ցուցանիշներով այն Խորհրդային Միությունում ուներ լավագույններից մեկի համարումը: Խմբի կազմավորումը պայմանավորված էր այդ տարիներին ԽՍՀՄ-ում օդանավերի առևանգման դեպքերով: 

1988-ից սկիզբ առած արցախյան շարժումը, ապա և դրան հետևած պատերազմը աշխատանքի նոր ճակատ էր նշանակում պետական անվտանգության հայաստանյան կառույցի համար: Այն իրենից ներկայացնում էր ոչ միայն սահմանային լարվածության դեպքերին մասնակություն, կանխարգելիչ գործողությունների իրականացում, սահմանամերձ բնակավայրերի բնակչության անվտանգության ապահովում, այլև ակտիվ ընդգրկվածություն սահմանային մարտական գործողություններին: 

 1994 թվականին հետևում է վարչության պետի մակարդակով Վ. Դալիբալթայանի առաջին նշանակումը` նրան է վստահվում կազմակերպված հանցագործության դեմ պայքարի ստորաբաժանման ղեկավարումը: Հետևողական, արդյունավետ աշխատանքի վկայումը դառնում են ոչ միայն նրան Մարտական խաչ 1-ին աստիճանի շքանշանի շնորհումը, այլև վարչության կարգավիճակ ունեցող «Ա» ստորաբաժանման ստեղծումն (1996) ու ղեկավարումը: Ստորաբաժանումը նախկին ԽՍՀՄ-ի, ապա և Ռուսաստանի Դաշնության «Ալֆա» կառույցի կրկնակն էր։ 

Ի դեպ հետաքրքիր մանրամասն՝ կապված Մարտական խաչ 1-ին աստիճանի շքանշանի հետ։ Առաջին՝ պետանվտանգության պատվավոր աշխատակից Վ․ Դալիբալթայանն այն ստացած առաջին անձնանցից մեկն է և երկրորդ՝ գործնականում Հայաստանում մեկ ձեռքի մատների վրա կարելի է հաշվել նույն ընտանիքի երկու անդամի (տվյալ պարագայում՝ հայր ու որդու), ովքեր այդ բարձր շքանշանի կրողներ են։ 

2001 թվականին հետևում է նրա նոր նշանակումը, որը ձգվեց շուրջ երկու տասնամյակ՝ ԱՊՀ հակաահաբեկչական կենտրոնում ամբողջ 18 տարի իրականացրել է ՀՀ լիազոր ներկայացուցչի գործառույթները: 

Ծառայությունից արձակվելուց առժամանակ անց, երբ երկիրը նորից զգաց Վ․ Դալիբալթայանի փորձի ու իմացության կարիքը, նախարարի խորհրդականի որակում նա 2021-ին հրավիրվեց Պաշտպանության նախարարություն, աշխատեց մինչև նախարարի պաշտոնաթողությունը։

Վարազդատ Դալիբալթայանը ողջ գործունեության ընթացքում անխաթար է պահել հոր` ԽՍՀՄ և Հայաստանի Հանրապետության պետական, ռազմական ականավոր գործիչ, Հայաստանի ազգային հերոս, գեներալ-գնդապետ Գուրգեն Հարությունի Դալիբալթայանի անունը, ով հայրենիքի կանչով երկրի համար բախտորոշ ժամանակահատվածում եկավ Հայաստան, զինվորագրվեց մեր նորանկախ երկրի ազգային բանակի կազմավորման բարդ ու դժվարին գործին:

ԱԱԾ պահեստազորի սպաների միություն ՀԿ