Ինչի՞ շուրջ կարող են պայմանավորվել Ժնևում Սերժ Սարգսյանն ու Իլհամ Ալիևը

ԵԱՀԿ Մինսկի խմբի համանախագահների նախաձեռնությամբ այսօր Ժնևում կկայանա Սերժ Սարգսյանի և Իլհամ Ալիևի հերթական հանդիպումը:

Հիշեցնենք, որ վերջին անգամ նախագահներն իրար հետ հանդիպել էին 2016 թ. ամռանը` Սանկտ Պետերբուրգում` Վլադիմիր Պուտինի հովանավորությամբ, որի արդյունքում կողմերը համատեղ հայտարարությամբ էին հանդես եկել, որտեղ հաստատում էին, որ մի շարք հարցերում առաջխաղացում են արձանագրել, սակայն հետագայում երկու երկրների հանդիպումների շարքն ընդհատվեց: Ադրբեջանի նախագահը հանդես էր գալիս կոշտ հռետորաբանությամբ, իսկ Հայաստանի նախագահը` հետագա բանակցությունները շարունակելու համար մի շարք նախապայմաններ էր առաջ քաշում: Բաքուն այդ նախապայմանները մերժեց, Սերժ Սարգսյանն էլ իր համաձայնությունը չէր տալիս հանդիպել Ալիևի հետ` առանց նախապայմանների կատարման: 

Այսօրվա հանդիպումից առաջ Իլհամ Ալիևը կրկին հանդես եկավ ռազմատենչ հայտարարություններով, իսկ հայկական կողմը գերադասեց Ալիևին պատասխանել նախագահի մամլո խոսնակ Վլադիմիր Հակոբյանի շուրթերով. "Հայկական կողմի համաձայնությունը` շարունակել բանակցությունները, չի նշանակում, որ հայկական կողմը փոխում է իր դիրքորոշումը` խնդրի կարգավորման վերաբերյալ, կամ հրաժարվում է այն պայմանավորվածություններից, որոնք ամրագրվել էին Վիեննայում և Սանկտ Պետերբուրգում ",- ասել է Հակոբյանը` հայկական լրատվամիջոցներից մեկին: 

Այսպիսով, ակնհայտ է, որ այսօրվա հանդիպումը նախաձեռնել են միջնորդները, մինչդեռ Հայաստանի և Ադրբեջանի դիրքորոշումները հեռու են առանցքային հարցերի շուրջ ընդհանուր հայտարարի գալուց: 

Zham.am