3 օրից Սահակաշվիլին սկսում է Պորոշենկոյի հեռացման գործընթացը

Հոկտեմբերի 17-ին Կիևում հայտարարված է համաուկրաինական թվով 3-րդ մայդանը, որը պատրաստվում է գլխավորել Վրաստանի նախկին նախագահ Միխեիլ Սահակաշվիլին:

Ըստ Սահակաշվիլիի, այս մայդանը Պորոշենկոյի առջև դնելու է 4 խնդիր` ողջ երկրով մեկ ստեղծել հակակոռուպցիոն դատարաններ, վերացնել պատգամավորական անձեռնմխելիության ինստիտուտը, փոխել ընտրական օրենսգիրքը, և չորրորդ` Պորոշենկոն պետք է վաճառի իր ողջ ունեցվածքը` ինչպես որ խոստացել էր իր ընտրողներին:

Ըստ Սահակաշվիլիի, եթե Պորոշենկոն հրաժարվի կատարել իր պահանջները, ապա մայդանը կդնի Պորոշենկոյի ` նախագահի պաշտոնից հեռացման հարցը:

Արդեն հայտարարվել է, որ Սահակաշվիլիին պաշտպանելու է Յուլյա Տիմոշենկոն, ուկրաինական երկրապահներից մի շարք կառույցներ: Պարզ է, որ Պորոշենկոն այդ պահանջները չի կատարելու, և ըստ էության սկսվելու է իշխանության քայքայման նոր փուլ: Եվ եթե հաշվի առնենք այն հանգամանքը, որ երկրի սոցիալ տնտեսական վիճակը չափազանց ծանր է, ապա կարող ենք արձանագրել, որ Սահակաշվիլիի երրորդ մայդանը մեծ աջակցություն է ստանալու ուկրաինացիների կողմից, մանավանդ որ Սահակաշվիլին խոստանում է ժողովրդին` իշխանության գալուց հետո կատարել մեկ այլ` հինգերորդ պայման, շեշտակիորեն իջեցնել բնակչության կոմունալ վճարումները, որոնք վերջին երեք տարվա ընթացքում ավելացել են 3 - 4 անգամ: Նշենք, որ նույն ժամանակահատվածում երկրի համախառն ներքին արդյունքը կրճատվել է համարյա երկու անգամ, իսկ ազգային արժույթը` գրիվնան, արժեզրկվել է երեք անգամ: 2014 -ին մեկ դոլարի դիմաց տալիս էին մոտավորապես 9 գրիվնա, իսկ 2017-ին մեկ դոլարի դիմաց տալիս էին 26 գրիվնա: 

Zham.am