«Ես հավատում էի իմ հաղթանակին». Գոռ Սահակյանն առաջին ոսկե մեդալը բերեց Հայաստանին

Երևանում ընթացող ծանրամարտի Եվրոպայի առաջնության 67 կգ քաշայինների պայքարում Հայաստանի ներկայացուցիչներից մրցահարթակ է դուրս եկել Գոռ Սահակյանը:

Պոկում վարժությունից հետո Սահակյանն առաջատար է: Եվրոպայի երիտասարդական առաջնութան կրկնակի չեմպիոնն առաջին մոտեցմամբ բարձրացրեց 140 կգ-անոց ծանրաձողը: Երկրորդ մոտեցմամբ Սահակյանը գլխավերևում պահեց 145 կգ կշռող ծանրաձողը:

Հայ ծանրորդի հետ այս վարժությունում ոսկե մեդալի համար պայքարում էր Թուրքիայի ներկայացուցիչը, սակայն նա երրորդ մոտեցմամբ չկարողացավ բարձրացնել 146 կգ-անոց ծանրաձողն ու 141 կգ արդյունքով գրավեց պոկում վարժության երկրորդ տեղը: Սահակյանը երրորդ մոտեցմամբ փորձեց բարձրացնել 147 կգ-ը, սակայն չկարողացավ ու 4 կգ-ի առավելություն ունեցավ թուրք ծանրորդի նկատմամբ:

***

«Թեժ պայքար ծավալվեց, առավել ևս, որ Հայաստանում է և մրցակիցներն էլ թուրք մարզիկներ են: Պատասխանատվությունը շատ-շատ էր: Ես հավատում էի իմ հաղթանակին: Եվ քրտնաջան աշխատել եմ այս ամենի համար: Ուրախ եմ, որ առաջին անգամ մասնակցելով մեծահասակների առաջնության` այսպիսի մեդալներ նվաճեցի»,-«Արմենպրես»-ի հաղորդմամբ` լրագրողների հետ զրույցում ասաց Սահակյանը: 

19-ամյա ծանրորդը շեշտեց, որ սպասում էր այս մեդալներին: 

«Շնորհակալ եմ նրանց, ովքեր հավատում էին ինձ: Այս կիլոգրամներն առաջին անգամ էի բարձրացնում: Սակայն մրցահարթակում ելույթներն այլ են»,-ասաց նա: