Ծանրամարտի Եվրոպայի առաջնության գովազդային արշավն իրականացրել է Արայիկ Հարությունյանի եղբայր` Արման Հարությունյանի «Մեդիահաուզ Արմենիա» ընկերությունը

Ինչպես հայտնի է, Երևանի Կարեն Դեմիրճյանի անվան մարզահամերգային համալիրում ապրիլի 14-ից մեկնարկել է ծանրամարտի Եվրոպայի առաջնությունը, որը վարկանիշային է Փարիզի 2024 թվականի օլիմպիական խաղերի համար: Հայաստանի ներկայացուցիչները Եվրոպայի առաջնությունում պայքարը կսկսեն ապրիլի 16-ից: Մրցումները կանցկացվեն ապրիլի 15-23-ը:

Oragir.News-ի տեղեկություններով` առաջնության բացման արարողությունը Հայաստանից բացի ուրիշ երկիր չի ցուցադրել: Կազմակերպական աշխատանքներով ակտիվորեն զբաղվում էր վարչապետի աշխատակազմի ղեկավար Արայիկ Հարությունյանը, ով կոտրած տաշտակի առաջ է հայտնվել: Նա աջ ու ձախ գումարներ է ծախսել, իբր այս միջոցառմամբ Հայաստանի վարկանիշը բարձրացնելու համար, բայց ոչինչ էլ չի ստացվել:

Ինչպես հայտնի է, մոտ 20մլն դրամ միայն ծախսել են հագուստների վրա: Մարզահամերգային համալիրում ծանրամարտի Եվրոպայի առաջնության բացման հանդիսավոր արարողության ժամանակ Ադրբեջանի դրոշը այրած դիզայներ Արամ Նիկոլյանն էր հեղինակել և կարել բացման հանդիսավոր արարողությանը ներկա ներկայացուցիչների զգեստները, այդ թվում՝ Ադրբեջանի դրոշովը:

«Հայկական Ժամանակ»-ը գրել էր, որ ներկայացուցիչների զգեստները հեղինակելու և կարելու համար Արամ Նիկոլյանը, ըստ պայմանագրի, ստանալու է 18,9 միլիոն դրամ, որից 12,3 միլիոն դրամն արդեն ստացել է։

Մեզ հայտնի դարձավ նաև, որ գովազդային արշավն էլ իրականացրել է Արայիկ Հարությունյանի եղբոր` Երևանի ավագանու անդամ, Երևանի արտաքին գովազդի զարգացման խորհրդի անդամ Արման Հարությունյանի «Մեդիահաուզ Արմենիա» ընկերությունը: