Նախ Մեծ Բրիտանիայի դեսպանատունը, իսկ այժմ՝ Ադրբեջանում ԱՄՆ դեսպանատունը մտահոգված են «Հայաստանում ադրբեջանցի զինվորի ճակատագրով և նրա նկատմամբ բռնություն ցուցադրող տեսանյութից»

«Միացյալ Նահանգները անհանգստացած է Հայաստանում ադրբեջանցի զինվորի նկատմամբ բռնություն ցուցադրող տեսանյութից։ Մենք կոչ ենք անում Ադրբեջանին և Հայաստանին լուծել բոլոր չլուծված խնդիրները խաղաղ բանակցությունների միջոցով»,- ասվում է Ադրբեջանում ԱՄՆ դեսպանատան հայտարարության մեջ։

Նշենք, որ Ադրբեջանում Մեծ Բրիտանիայի դեսպան Ֆերգյուս Օլդն էլ, իր հերթին, թվիթերյան էջում դատապարտել է Հայաստանում հայտնաբերված ադրբեջանցի զինվորականի նկատմամբ վերաբերմունքը։ Նա գրել է․ «Սարսափելի է տեսնել ադրբեջանցի զինվորի նկատմամբ բռնության մասին տարածված տեսանյութը։ Միջազգային մարդասիրական իրավունքով նման վերաբերմունքն անընդունելի է։ Նման միջադեպերը պետք է դատապարտվեն, եթե ցանկանում ենք կայուն խաղաղություն հաստատել տարածաշրջանում»։

Հիշեցնենք, որ երեկ՝ ապրիլի 13-ին, Սյունիքի մարզում հայտնաբերվել է ադրբեջանցի զինծառայող, որը որոնվում էր ապրիլի 10-ից։ Նախապես հայտարարվել էր, ևս մեկի ձերբակալման մասին։ Երկու զինծառայողին էլ հայտնաբերել են քաղաքացիները։

Հիշեցնենք, որ Հայաստանի սահմանը հատած ադրբեջանցի երկրորդ զինծառայողը, մինչև հայտնաբերվելն ու ձերբակալվելը, սոցցանցում հայերի դեմ բռնության կոչեր է հնչեցրել: Նա մասնավորապես ասել է հետևյալը. «Մենք հայերի արյուն ենք թափել, հայերի գլուխ ենք կտրել։ Մենք դեռ լավ ենք, չենք մահացել: Եթե մահանանք, թող մեզ գնահատեն։ Մենք հայրենիքի դավաճան չենք»,- տեսանյութում ասել է ադրբեջանցի զինծառայողը:

Zham.am