Շենքը սարքել են, մեզ ասում են՝ դուք այստեղ տեղ չունեք, բայց մենք ունենք պայմանագրեր. Ֆիրդուսի թաղամասի բնակիչների ակցիան
Երևանի Ֆիրդուսի թաղամասի բնակիչներն այսօր՝ ապրիլի 14-ին, բողոքի ակցիա են իրականացրել ՀՀ կառավարության շենքի մոտ՝ պահանջելով իրենց գույքի համար պատշաճ փոխհատուցում տալ։
Նշենք, որ դեռ 2015 թվականին, կառավարությունը, ելնելով գերակա հանրային շահից, որոշել է քանդել «Ֆիրդուսի» թաղամասի մի քանի տներ և պահեստներ։ Բնակիչների մեծ մասը փոխհատուցում է ստացել, սակայն կան բնակիչներ, որոնք փոխհատուցման չափը համարում են անհամաչափ և չեն լքում իրենց տները։ Բնակիչներից մեկը նշեց, որ մարտի 23-ին դիմում են ներկայացրել փոխվարչապետի օգնականին, որպեսզի 10 օրում պատասխանեն, բայց հիմա ասում են, որ դեռ պատասխանը չկա: Հիմա ուզում ենք հասկանալ, թե ով է մեզ պատասխան տալու: Ուզում ենք վարչապետը մեզ ընդունի, լսի մեր խնդիրների մասին, որ տեսնենք՝ ինքը տեղյակ է այս խախտումների մասին, թե ոչ»:
Հարցին, թե որքան փոխհատուցում են առաջարկում, նա պատասխանեց. «Ժամանակին մարդկանց մեկ քմ-ի դիմաց 580-600 դոլար են վճարել, հիմա տները 10 անգամ թանկացել են, մեզ առաջարկում են 1200-1500 դոլար: Հիմա կոնկրետ մեր թաղամասում շենք են սարքում, որտեղ մեկ քմ-ն 5,5-7 հազար դոլար է արժենալու: Մենք էլ 2008-ից պայմանագիր ենք կնքել, որ մեզ պետք է այդտեղ տուն հատկացնեն: Հիմա շենքը սարքել են, մեզ ասում են՝ դուք տեղ չունեք, ձեզ չենք տալիս: Կառուցապատող է փոխվել, որի իրավունքը չեն ունեցել, որովհետեւ պայմանագրում նշված է, որ երրորդ անձի ի հայտ գալու դեպքում կողմերը պետք է գրավոր համաձայնություն տան: Բայց ոչ մի նման բան չի եղել: 70-80 տուն կա, որ այս խնդիրն ունի»:
Հիշեցնենք՝ Երևանի կենտրոնում գտնվող Ֆիրդուսի թաղամասն առաջին անգամ հանրային գերակա շահ հռչակվեց 2008 թվականին, նույն որոշումը վերահաստատվեց նաև 2018 թվականի մարտի 22-ին` «թավշյա հեղափոխությունից» մեկ ամիս առաջ:
Թաղամասի կառուցապատումը նախատեսվում է ավարտել 2023-2024 թվականներին: Ըստ կառուցապատման նախագծի՝ Ֆիրդուսի նոր թաղամասում լինելու են ինչպես բնակելի շենքեր, այնպես էլ հյուրանոցներ ու բիզնես կենտրոններ: