Թուրքիայում վիրահատությունները հետաձգվում են արյան պաշարների կրիտիկական նվազման պատճառով. Aydınlık

Թուրքիայում արյան պաշարները նվազել են՝ հասնելով կրիտիկական մակարդակի, վիրաբույժները ստիպված են հետաձգել վիրահատությունները, գրել է Aydınlık թերթը։

«Թուրքական «Կարմիր մահիկի» (Kızılay) ընկերությունը քաղաքացիներին դոնորության կոչ է արել՝ հայտարարելով, որ արյան պաշարներն իջել են կրիտիկական մակարդակից, եւ որ արյան պակասը խանգարում է սրտի որոշ վիրահատությունների կատարմանը։ Սիրտ-անոթային վիրաբուժության թուրքական ընկերության նախագահ, պրոֆեսոր Քյուրշաթ Բոզքուրթն ասել է, որ մի շարք վիրահատություններ ստիպված հետաձգվում են»,- գրել է պարբերականը։

«Մենք խնդրի առաջ ենք կանգնել։ Մենք ի վիճակի չենք որոշակի վիրահատություններ կատարել»,- թերթը մեջբերել է բժշկի խոսքերը, որը նաեւ հայտարարել է, որ թուրքական երեք մեգապոլիսներում հետաձգվել է վիրահատությունների մոտ 20-30 տոկոսը։

Բոզքուրթն ընդգծել է, որ գոյություն ունի մեծ խնդիր հատկապես Իզմիրի մասնավոր հիվանդանոցներում, եւ որ վիրահատությունների զգալի մասն անցած շաբաթ հետաձգվել է Ստամբուլի եվրոպական կողմի շատ մեծ հիվանդանոցում։

«Որոշ տեղերում վիրահատությունները փակուղի են մտել»,- ասել է Բոզքուրթը՝ ավելացնելով, որ լուրջ խնդիրներ են առաջացել նաեւ Անկարայի հիվանդանոցներում։

Սիրտ-անոթային վիրաբուժության թուրքական ընկերության կարծիքով՝ Kızılay-ը պետք է փոխի խնդրի լուծման իր ռազմավարությունը։

Աղբյուր՝ News.am