Փաշինյանի ուղղությամբ անձրեւանոց նետած կինը Բերձորից տեղահանվածներից է

Նիկոլ Փաշինյանն այցելել է Վայոց Ձորի մարզ։ Hayastan.news-ին հանդիպման մասնակիցներից մեկը պատմեց, որ միջադեպ է գրանցվել այցի ընթացքում։ Ըստ աղբյուրի՝ հանդիպման ժամանակ քաղաքացիներից մեկը փորձել է հարվածել Փաշինյանին, նա անձրևանոցը նետել է ուղիղ Փաշինյանի ուղղությամբ։

Անվտանգության ծառայողները դեպքի վայրից քաղաքացուն հեռացրել են։

***

Վայոց ձորում մի կին անձրևանոց է նետել Փաշինյանի ուղղությամբ։

Քննչական կոմիտեից @ArmeniaSputnik-ին հայտնեցին, որ դեպքի առթիվ քրեական վարույթ նախաձեռնելու հարցն է քննարկվում։

 ***

NEWS.am-ը գրում է․ Վայոց Ձոր կատարած այցելության ժամանակ Նիկոլ Փաշինյանի ուղղությամբ անձրեւանոց նետած կինը Բերձորից տեղահանված է։

NEWS.am-ին Մալիշկայի գյուղապետ Գարիկ Նազարյանն ասաց, որ կինն իրենց գյուղում վարձով է ապրում։

«Մալիշկան մեծ գյուղ է, Բերձորից շատ ընտանիքներ են ապրում, ես չեմ կարող ասել, թե ով է եղել»,- ասաց գյուղապետը։

Նա պատմեց, որ այցի ընթացքում նա եղել է Փաշինյանի կողքին, եւ այդ միջադեպը չի նկատել։

Նշենք, որ Փաշինյանի ուղղությամբ անձրեւանոց նետած կինը բերման է ենթարկվել։ Այժմ քննարկվում է դեպքի առթիվ քրեական վարույթ նախաձեռնելու հարցը։

***

MediaHub-ը գրում է․ Հայկական լրատվամիջոցները հայտնում են, որ Վայոց ձորում մի կին անձրևանոց է նետել Փաշինյանի ուղղությամբ։ Հիշեցնենք՝ Նիկոլ Փաշինյանն այսօր աշխատանքային այցով Վայոց ձորի մարզում էր։

MediaHub-ի տեղեկություններով՝ Նիկոլ Փաշինյանի ուղղությամբ անձրևանոց նետած կինն այս պահին գտնվում է ՀՀ քննչական կոմիտեում։

Կառույցից MediaHub-ին հայտնել են, որ այս պահին քննարկվում է դեպքի առթիվ քրեական վարույթ նախաձեռնելու հարցը։

Ըստ տեղեկությունների՝ կինը մեղադրվում է «պաշտոնատար անձի օրինական ծառայողական կամ քաղաքական գործունեությանը միջամտելու մեջ»։

***

Փաշինյանի ուղղությամբ անձրեւանոց նետած կինն ազատ է արձակվել։ 

Այս մասին @ArmeniaSputnik-ը տեղեկացավ ՔԿ մամուլի խոսնակ Գոռ Աբրահամյանից։