ՀՀ տարածքում հայտնաբերվել և ձերբակալվել է Ադրբեջանի ԶՈՒ զինծառայող. Նրա հետ եղել է եւս մեկը. Տեսանյութ, թարմացվում է

Երեկ Սիսիանի Բնունիս համայնքում ադրբեջանցիներ են հայտնվել: Տեղեկությունը Sputnik Արմենիայի հետ զրույցում հաստատեց համայնքի վարչական ղեկավար Գոռ Հովհաննիսյանը։

«Ադրբեջանցիները բնակիչներից մեկի դռան զանգն են տվել։ Դուռը բացած կինն անմիջապես դիմել է ոստիկանություն, և ոստիկաններն էլ շատ արագ եկել են»,–ասաց Հովհաննիսյանը։

Ադրբեջանցի զինվորականը մտել է Սիսիանի գյուղերից մեկի տներից մեկը, հաց կերել, տանտիրոջ պիջակը հագնվել ու դուրս է եկել գյուղամեջ։ Տեղեկությունը «Փաստինֆո»-ի հետ զրույցում հայտնեց Սիսիանի բնակիչներից մեկը։ Զրուցակիցս ասում է՝ տանտիկինը իմացել է, թե խոհանոցում իր ամուսինն է հաց ուտում, ինքն էլ իր գործերով է զբաղվել։

«Մտել է տներից մեկը, հաց է կերել, շորերը փոխել է էդ մարդկանց տանը, տանտիրոջ կուռտկեն միջանցքում կախած ա եղել, իրա շորերը հանել ա, էդ շորերը հագել ա ու դուրս ա եկել։ Հետո գնացել ա նստել ա գյուղի խանութի առաջ, որ կառտ խաղա»,- ասաց նա՝ հավելելով, որ ինքն էլ ուրիշներից է այդ պատմությունը լսել։ Նրա խոսքով՝ խանութի մոտ հավաքված տղամարդիկ գլխի են ընկել, որ իրենց դիմաց ո՛չ հայ է, ո՛չ ռուս։ Բռնել են, զանգել են ԱԱԾ, եկել են, տարել են։

«Ռուսերեն կմկմացել ա, բռնել են, ասել են՝ հլը տեսնենք՝ էս ով ա։ Նենց տեղերից է անցել, որ էնտեղ պոստ կա, անհնար ա ընդեղից անցնել։ Պոստերով չէ, է՜ն վերևներով ա եկել։ Մառախուղ ա եղել, մոլորվել ա»,- նշեց բնակիչը։

***

Ադրբեջանցիները երեկ եղել են Սիսիանի Բնունիս համայնքում, բնակիչներից մեկի դռան զանգն են տվել։ Դուռը բացած կինը դիմել է ոստիկանություն, վերջիններս էլ արագ եկել են: Tert.am-ի հետ զրույցում, անդրադառնալով Սիսիանի Բնունիս համայնքում ադրբեջանցիների հայտնվելու վերաբերյալ տեղեկությանը, ասաց համայնքի վարչական ղեկավար Գոռ Հովհաննիսյանը:

Հարցին՝ ինչ վիճակ է այս պահին համայնքում, Հովհաննիսյանը պատասխանեց՝ իրավիճակը հանգիստ է, խուճապ չկա։

***