Հավատում ենք, որ դարեր շարունակ «հանդուրժողականության և խաղաղության պայմաններում» ապրած թուրքերն և հայերը կարող են կարգավորել հարաբերությունները. Թուրքիայի ՊՆ ղեկավար

Թուրքիայի պաշտպանության նախարարն Անկարայի Բիլիմի համալսարանի կազմակերպված թեմատիկ սեմինարում ելույթի ժամանակ մեկնաբանել է Օսմանյան կայսրության իրագործած Հայոց ցեղասպանությունը, որը նա անվանել է «1915 թվականին Օսմանյան կայսրությունում տեղի ունեցած իրադարձությունները» (չակերտները՝ Tert.am): Այս մասին հայտնում է aydinlik.com.tr կայքը: Թուրք պաշտոնյայի պնդմամբ՝ «Հայկական հարցը», իբր, «ոչ մի կապ չունի պատմական իրողությունների հետ և օգտագործվում է որպես քաղաքական գործիք ընդդեմ Թուրքիայի» (չակերտները՝ Tert.am)։

Նրա խոսքով՝ Օսմանյան կայսրությունում 1915 թվականին տեղի ունեցած «իրադարձությունների» (Ցեղասպանությունը՝ Tert.am) նկատմամբ «կանխակալ» (չակերտները՝ Tert.am) մոտեցումն այս հարցի լուծումը տանում է փակուղի։

««Հայկական հարցը» ծագել է հիմնականում այնպիսի տերությունների «շահերից ելնելով իրականացվող սադրանքների» (չակերտները՝ Tert.am) ֆոնին, ինչպիսիք են ԱՄՆ-ը, Մեծ Բրիտանիան, Ֆրանսիան և Ռուսաստանը»,- ասել է Աքարը՝ հավելելով, որ հայերը դարեր շարունակ օսմանյան կայսրությունում համարվել են «հավատարիմ ազգ»: Նրա պնդմամբ՝ ոչ թե թուրքերն են հայերին կոտորել, այլ «հայերը՝ թուրքերին» (չակերտները՝ Tert.am): Աքարի խոսքով՝ չնայած այս ամենին, Թուրքիան շարունակում է հավատալ, որ դարեր շարունակ «հանդուրժողականության և խաղաղության պայմաններում» չակերտները՝ Tert.am) միասին ապրած թուրք և հայ ժողովուրդները կարող են կարգավորել հարաբերությունները բարեկամության և համագործակցության շրջանակում:

«Մեր նախագահն ամեն առիթով և հարթակից հայտարարում է, որ մենք՝ որպես Թուրքիա, բացում ենք մեր արխիվները և բաց ենք պատմաբանների կողմից ստեղծվելիք օբյեկտիվ հանձնաժողովների համար։ Մենք վերահաստատում ենք մեր վճռական կոչն այս հարցում։ Ինչպես Թուրքիան, այնպես էլ Հայաստանը պետք է միջազգային ասպարեզում բացի իր արխիվները պատմաբանների համար, ընդունի արդյունքները։ Սակայն այս առաջարկին դեռ պատասխան չի ստացվել», - եզրափակել է Աքարը։

Աղբյուր` Tert.am