Դոնալդ Թրամփին ավելի քան 30 մեղադրանք է առաջադրվել

ԱՄՆ նախկին նախագահ Դոնալդ Թրամփին ավելի քան 30 մեղադրանք է առաջադրվել, այդ թվում՝ բիզնեսում խարդախության հետ կապված, այս մասին հայտնում է CNN-ը։

Թրամփի փաստաբանն իր հերթին հայտնել է, որ նախկին նախագահը մոտակա երեքշաբթի կներկայանա դատարան։ Սյուզան Նեչելեսի խոսքով, Թրամփը կներկայանա Նյու Յորք նահանգի Գերագույն դատարան։

Դոնալդ Թրամփը, մեկնաբանելով Մանհեթենի շրջանային դատախազության՝ իր դեմ ուղղված մեղադրանքներին, ասել է, որ չի կարող հույս դնել Նյու Յորքում արդար դատավարության վրա։

Թրամփը նշել է, որ մեղադրանքը «կեղծ է, կոռումպացված, ամոթալի», որակել այն՝ «քաղաքական» և պնդել, որ դա «միջամտություն է առաջիկա ընտրություններին», գրում է РИА Новости-ն:

Հիշեցնենք նաև, որ ավելի վաղ ամերիկացի միլիարդատեր Իլոն Մասկն իր Twitter-ում կարծիք էր հայտնել, որ ԱՄՆ նախկին նախագահ Դոնալդ Թրամփի ձերբակալությունը նրան ջախջախիչ հաղթանակ կապահովի 2024 թվականի նախագահական ընտրություններում։

Zham.am