ԵԽԽՎ-ի հավանական նոր նախագահը կարող է հայամե՞տ լինել

Ինչպես հայտնի է վերջերս ԵԽԽՎ-ի նախագահ Պեդրո Ագրամունտը ինքնակամ հրաժարական տվեց իր պաշտոնից: Իսպանիան ներկայացնող այս գործիչը հայտնի էր իր հակահայկական կեցվածքով, ով ամենուրեք աջակցում էր Ադրբեջանին: Դժվար է ասել` նա կապ ունե՞ր ադրբեջանական այսպես կոչված «լվացքատան» հետ, թե` ոչ, բայց նրա կենսագրության մի դրվագ ասում է ամեն ինչ: Նա Իսպանիայի Ժողովրդական կուսակցության անդամ էր սկսած 1989 թվականից: Ընդ որում, նա այդ կուսակցության տարածքային ղեկավարն էր Վալենսիայում: Այսինքն, նա մի գործիչ էր, ով իր երկրի ինքնավար մարզում հմտորեն պայքարում էր Իսպանիայի գերակա շահի համար` ընդդեմ տեղի անջատողականների: Ու տրամաբանական էր, որ նա իր կեցվածքով պետք է լիներ ադրբեջանամետ և ընդդեմ հայերի: Սակայն նրա բախտը չբերեց: Նա գործարքի գնաց ռուսների հետ, մեկնեց Սիրիա և սեղմեց Ասադի ձեռքը, ինչը մեծ զայրույթ առաջացրեց եվրոպացիների մոտ: Ահա այս ամենի պատճառով էլ նա ստիպված եղավ հրաժարական տալ: ԵԽԽՎ-ի նախագահի նոր պաշտոնին հավակնում են` Կիպրոսը ներկայացնող Ստելլա Կիրիակիդիսը և Լիտվան ներկայացնող Էմանուելիս Զինգերիսը: Նշենք, որ քվեարկության 2-րդ փուլի ընթացքում Կիպրոսի ներկայացուցիչը ստացավ 121 ձայն, իսկ լիտվացի Զինգերիսը` 69 ձայն:
Այսօր կկայանա քվեարկության 3-րդ փուլը, քանի որ թեկնածուներից ոչ մեկը չկարողացավ ստանալ ձայների մեծամասնությունը, այսինքն` 152 ձայն: Այսօրվա քվեարկության արդյունքում ԵԽԽՎ նախագահը կարող է ընտրվել արդեն հասարակ մեծամասնություն ստանալով: Եվ մեծ հավանականություն կա, որ ԵԽԽՎ-ի նախագահը կարող է ընտրվել հենց Կիպրոսի ներկայացուցիչը, որը հայկական կողմի համար խիստ շահեկան կլինի: Ու տրամաբանական է, որ նրա դեմ են թուրքական և ադրբեջանական պատվիրակությունները: Լիտվացուն հիմնականում աջակցում են թուրքերը, ադրբեջանցիները, լիտվացիները, լատվիացիները, էստոնացիները և լեհերը:

Zham.am