Թուրքմենստանի նախկին նախագահն առաջարկել է Էրդողանին ներկայացնել Խաղաղության նոբելյան մրցանակի

Թուրքմենստանի Հալք Մասլահաթիի (Ժողովրդական խորհրդի) նախագահ, երկրի նախկին նախագահ Գուրբանգուլի Բերդիմուհամեդովն Անկարայում, Թյուրքական պետությունների կազմակերպության (ԹՊԿ) գագաթաժողովում առաջարկել է Թուրքիայի նախագահ Ռեջեփ Թայիփ Էրդողանին ներկայացնել Խաղաղության նոբելյան մրցանակի։ Այս մասին գրել է «Нейтральный Туркменистан» թերթը։

Բերդիմուհամեդովը նշել է, որ արդեն 22 տարի ճանաչում է Էրդողանին, «որն ականավոր անձնավորություն է, համաշխարհային մակարդակի քաղաքական գործիչ»։ Նրա խոսքով՝ Թուրքիայի առաջնորդը «խաղաղ կյանքի ապահովման մեծ աշխատանք է կատարում ոչ միայն իր ժողովրդի, այլեւ բոլոր մուսուլմանական ժողովուրդների համար»։

«Ելնելով դրանից՝ առաջարկվում է Թուրքիայի Հանրապետության նախագահին առաջադրել Խաղաղության նոբելյան մրցանակի, եւ մենք լիովին աջակցում ենք բոլոր համապատասխան առաջարկներին։ Նա այդ միջազգային մրցանակին արժանի ղեկավար է»,- ասել է Թուրքմենստանի նախկին նախագահը։

Աղբյուր՝ News.am