Սի Ցզինպինը մեկնում է Մոսկվա. սպասվում է մի շարք կարևոր երկկողմ փաստաթղթերի ստորագրում

Չինաստանի նախագահ Սի Ցզինպինը՝ ՌԴ նախագահ Վլադիմիր Պուտինի հրավերով, մարտի 20-22-ը կայցելի Ռուսաստան, հայտնում է Կրեմլի մամուլի ծառայությունը։

«Բանակցությունների ընթացքում կքննարկվեն Ռուսաստանի և Չինաստանի միջև համապարփակ գործընկերային հարաբերությունների հետագա զարգացման և ռազմավարական փոխգործակցության արդիական հարցեր»,-ասվում է հաղորդագրության մեջ։

Այցի ընթացքում նախատեսվում է նաև մտքերի փոխանակում միջազգային ասպարեզում Մոսկվայի և Պեկինի միջև համագործակցության խորացման շուրջ։ Բանակցությունների արդյունքում կստորագրվեն մի շարք կարեւոր երկկողմ փաստաթղթեր, ընդգծել են Կրեմլում։

Չինաստանի ԱԳՆ-ն նշել է, որ Սի Ցզինպինը Պուտինի հետ մտքերի խորը փոխանակում կանցկացնի երկկողմ հարաբերությունների, միջազգային և տարածաշրջանային հարցերի շուրջ։ Բանակցություններն ընթանալու են երրորդ կողմերին  չթիրախավորելու սկզբունքների հիման վրա։

Չինաստանի ԱԳՆ-ն նաև ընդգծել է, որ Չինաստանը հավատարիմ կմնա Ուկրաինայի նկատմամբ օբյեկտիվ դիրքորոշմանը և կառուցողական դեր կխաղա բանակցություններն առաջ մղելու գործում։

Zham.am