Փաշինյանը Ֆրանսիայից բացի Ադրբեջանի հետ բանակցային սեղանի շուրջ է հրավիրում ԱՄՆ-ին և Գերմանիային. Արդյո՞ք նա նրանց է տեսնում որպես խաղաղության պայմանագրի կետերի պահպանման երաշխավորներ. Տեսանյութ

Civilnet.am-ը գրում է. Նիկոլ Փաշինյանը դժգոհ է հայ-ադրբեջանական բանակցությունների բրյուսելյան ձևաչափից:

«Մենք ֆունդամենտալ խնդիր ենք տեսել բրյուսելյան ձևաչափի մեջ: Մենք բազմաթիվ բաներ պայմանավորվել ենք, բայց գրեթե ոչինչ չի իրագործվել»,-մարտի 14-ին ասուլիսի ժամանակ ասաց վարչապետ Փաշինյանը` հիշեցնելով, որ 2021 թվականի դեկտեմբերի 14-ին բրյուսելյան եռակողմ բանակցություններում պայմանավորվել էին գործարկել Երասխ-Սադարակ-Օրդուբադ-Մեղրի-Հորադիզ երկաթուղին, ինչն այդպես էլ չիրագործվեց:

«Երկաթուղին պետք է գործի այն երկրների օրենսդրությանը համահունչ, որի տարածքով այն անցնում է: Այդ պայմանավորվածության մասին գրառում ես կատարել եմ եռակողմ բանակցությունների սենյակում՝ բովանդակությունը վերստուգելով ու ճշտելով: Մինչև այժմ երկաթուղու շինարարությունը չի վերսկսել: Ուղիղ մեկ շաբաթ անց, երբ պետք է այդ պայմանավորվածությունը գրավոր տեսքով հաստատվեր, Ադրբեջանը հրաժարվեց»,-ասաց Նիկոլ Փաշինյանը:

Նա նկատեց, որ բրյուսելյան ձևաչափով տասից ավել նման պայմանավորվածություններ են ձեռք բերել, բայց դրանք չեն իրագործվել՝ ներառյալ գերիների ազատ արձակման հարցը:

«Կա խոսույթ, և դա ճիշտ խոսույթ է՝ երբ չկան բանակցություններ, էսկալացիայի վտանգն ավելանում է: Բրյուսելը մեզ ցույց տվեց, որ կան բանակցություններ, որոնք ոչ միայն չեն նվազեցնում էսկալացիայի վտանգը, այլ ավելացնում են»,- նկատեց Փաշինյանը՝ հշեցնելով, որ անցյալ տարվա սեպտեմբերին Ադրբեջանի լայնածավալ հարձակումն ընդդեմ Հայաստանի տեղի ունեցավ Բրյուսելում հանդիպումից տասներեք օր անց` սեպտեմբերի 13-ին:

Հայաստանը, ինչպես նկատեց Փաշինյանը, չի հրաժարվում բրյուսելյան ձևաչափով բանակցություններից, սակայն կողմ է, որ նախկինում ձեռք բերված պայմանավորվածությունները կատարվեն:

«Եթե տասից ավել պայմանավորվածություններ կան, ու դրանք չեն իրագործվում, ի՞նչ իմաստ կա նոր բան պայմանավորվելու շուրջ աշխատանք կատարել»,- հարցադրում արեց վարչապետ Փաշինյանը:

Չնայած բրյուսելյան ձևաչափի արդյունավետության հետ կապված խնդրին` Փաշինյանը շատ արդյունավետ գնահատեց անցյալ տարվա հոկտեմբերին Պրահայում տեղի ունեցած քառակողմ բանակցությունները: «Հիմա Ֆրանսիայի միջնորդությամբ քառակողմ ձևաչափով բանակցութուններն Ադրբեջանին դուր չեն գալիս, բայց այդտեղ էլ լուծում կա: Եկեք հնգակողմ անենք՝ Գերմանիային էլ հրավիրենք, ԱՄՆ-ին էլ հրավիրենք: Մենք պատրաստ ենք»,- ասաց նա։

Փաշինյանը նշեց, որ այս պահին ադրբեջանական կողմի հետ նոր հանդիպման պայմանավորվածություն չկա: «Այս պահին հանդիպում նախատեսված չէ: Ես երբեք չեմ խուսափել հանդիպումից: Բայց պետք է լինեն պայմանավորվածությունների կատարման երաշխիքներ»,- նկատեց Փաշինյանը:

Մանրամասները՝ տեսանյութում: