ԱՄՆ հետախուզությունը Հայաստանի և Ադրբեջանի միջև լարվածություն է կանխատեսել. մեկնաբանում է Նեդ Փրայսը

Հայաստանի և Ադրբեջանի միջև խաղաղություն հաստատելու ջանքերը միշտ են եղել և մնում են հրատապ ԱՄՆ-ի համար, որովհետև նուրբ իրավիճակ է ստեղծվել․ հայտարարել է ԱՄՆ Պետքարտուղարության խոսնակ Նեդ Փրայսը հերթական ճեպազրույցում՝ պատասխանելով հարցին, որը վերաբերում էր ԱՄՆ հետախուզության հրապարակած տվյալներին։

Ըստ զեկույցի՝ ԱՄՆ հետախուզությունը Հայաստանի և Ադրբեջանի միջև լարվածություն է կանխատեսում՝ հաշվի առնելով խաղաղության պայմանագրի բացակայությունը, զինված ուժերի՝ միմյանց մերձ գտնվելը և հրադադարի ռեժիմի նկատմամբ վերահսկողության մեխանիզմի բացակայությունը։

«Դա մի իրավիճակ է, որը չափազանց հակված է դեպի բռնությունը, ինչը մենք տեսանք վերջին օրերին Լեռնային Ղարաբաղի տարածաշրջանում, և դա մի երկարատև հակամարտություն է, որ Միացյալ Նահանգները կցանկանար անել ամենը, ինչ կարող է, դրա լուծմանն աջակցելու համար», - շարունակել է Պետդեպարտամենտի խոսնակը:

«ԱՄՆ-ը կշարունակի երկկողմանի աշխատանքը այդ երկրների հետ, եռակողմ աշխատանքը Հայաստանի և Ադրբեջանի հետ՝ աջակցելով երկխոսության և դիվանագիտության նրանց ջանքերին, նաև բոլոր համապատասխան մեխանիզմների միջոցով՝ օգնելով այս երկրներին ինքնուրույն դիվանագիտություն վարել և հասնել համաձայնությունների, որոնց, հուսով ենք, կկարողանան հասնել», - ընդգծել է Նեդ Փրայսը:

Zham.am