1 մլրդ 100 մլն դրամ` մետրոպոլիտենի «Աջափնյակ» կայարանի կառուցման համար

Պետբյուջեից 1 մլրդ 100 մլն դրամ կհատկացվի Տարածքային կառավարման և ենթակառուցվածքների նախարարությանը Աջափնյակի նոր մետրոյի կայարանի կառուցման նախագծային և նախահաշվային աշխատանքների ձեռք բերման և ֆինանսավորման համար: Նոր կայարանի երկարությունը լինելու է 1.5 կմ, շինաշխատանքներն էլ տևելու են 4 տարի: Երևանի քաղաքապետարանում քննարկում են մայրաքաղաքում ևս երկու ուղղությամբ նոր կայարաններ ունենալու հարցը:

Երևանի փոխքաղաքապետ Տիգրան Ավինյանը կառավարության նիստում ասաց, որ քննարկեվել է նաև «Փեթակ»-ի տարածքում գտնվող հատվածում ևս մեկ կայարան ստեղծելու հարցը։ «Աջափնյակի կայարանի կառուցումից հետո, ամենայն հավանականությամբ, մետրոն այդ նույն գծով շարունակվելու է:

Երկու պոտենցիալ ուղղություններ կան՝ մեկը դեպի Դավթաշենի ուղղությունը, մյուսը՝ դեպի Աջափնյակ վարչական շրջանի խորքը: Քաղաքապետարանն առաջարկելու է մետրոյի շարունակական զարգացման ծրագիր, որ ամեն տարի ունենանք նոր կայարանների բացման ուղղությամբ կատարվող աշխատանքներ»,-ասաց փոխքաղաքապետը: Ավինյանը սա համարեց ենթակառուցվածքներում ամենաարդյունավետ ներդրումներից մեկը: «Միայն Աջափնյակի կայարանի շահագործմամբ՝ մետրոյում, մեր կանխատեսմամբ, ուղևորափոխադրումների քանակն աճելու է 22 տոկոսով: Մետրոն իր վրա է վերցնում էական բեռ՝ նվազեցնելով փողոցների ծանրաբեռնվածությունը»,-նշեց Ավինյանը:

Աղբյուր` Armeniasputnik.am